Намалена е цената за изнајмување на грчките историски споменици

25/01/2012

Грчките власти издадоа „црн список“ на субјекти што избегнуваат плаќање данок во земјата. Исто така во бизнис-вестите: се очекува Хрватска да има финансиски придобивки од нејзиното приклучување во ЕУ.

Партенонот може да се изнајми за околу 1.000 евра за фотосесија. [Ројтерс]

Минатата седмица, грчките културни власти најавија планови да ги нудат историските споменици во земјата за потребите на филмската и модната индустрија во обид да се надомести намалувањето на јавното финансирање. Иако повеќето историски места и претходно можеле да се изнајмат, според новите планови, цената за изнајмување е помала за 60 отсто. Сите проекти ќе мора да бидат одобрени од страна на грчкиот археолошки совет пред да се дозволи нивното реализирање.

***

Европската банка за обнова и развој (ЕБОР) рече дека регионот ќе почувствува поголеми последици од должничката криза отколку што се очекувало претходно. Во својата последна процена на економиите во Централна и во Источна Европа што беше објавена во вторникот (24. јануари), банката сега предвидува дека седумте балкански економии ќе забележат економски раст од само 1 отсто оваа година, а во октомври предвидуваше раст од 1,6 отсто.

***

Во понеделникот (23. јануари) агенцијата за рангирање „Фич“ рече дека хрватската економија ќе почувствува опипливи придобивки од идното пристапување во ЕУ на земјата. Изјавата следеше откако во неделата земјата изгласа референдум за приклучување во ЕУ.

***

Во неделата (22. јануари), грчките власти објавија „црн список“ на субјекти што избегнуваат плаќање данок во земјата во уште еден обид да наплатат долгови за да подобрат дел од својата ослабена финансиска состојба. Таканаречениот „срамен список“ вклучува имиња на повеќе од 4.000 лица, вклучувајќи и бизнисмени и славни личности што не платиле данок во износ поголем од 14 милијарди евра.

***

Во понеделникот (23. јануари), агенцијата за рангирање „Мудис“ предупреди дека протестите против мерките за штедење и за здравствената реформа во Романија можат негативно да влијаат врз кредитниот рејтинг на земјата затоа што ќе ѝ отежнат на Владата да ги изврши саканите реформи. Во моментот Романија е рангирана како Баа3 - инвестициски рејтинг со позитивни изгледи.

***

Три турски града се најдоа на списокот на светски брзорастечки метрополски економии. Извештајот на „Брукингс институшн“, „Глобал метро монитор 2011“ на четврто место ја става провинцијата Измир, Анкара на шесто, а Истанбул на седмо место. Списокот проценува 200 метрополски економии врз основа на фактори како што се приходите и вработувањето по глава на жител.

***

Во средата (18. јануари), бугарскиот парламент реши да забрани хидраулично дупчење во земјата, а казната за прекршување е 50 милиони евра за сите прекршители. Одлуката, што ги попречи плановите на „Шеврон корпорејшн“ да истражува извори на гас од шкрилци во североисточниот дел на земјата, била донесена под притисок на јавните протести.

***

ММФ ја одложи првата ревизија на превентивниот аранжман од 1 милијарда евра склучен со Србија поради буџетските планови на земјата за 2012 година. Конкретно, ММФ се плаши дека некои големи инвестициски проекти можат да ги загрозат важечките ограничувања за јавни долгови и за фискални дефицити. Јуриј Бајец, економски советник на премиерот Мирко Цветковиќ, рече дека за две недели следат разговори на таа тема.

***

Во неделата (22. јануари), албанското министерство за економија и соодветното министерство на Обединетите Арапски Емирати потпишаа спогодба за зајакнување на економската, трговската и техничката соработка помеѓу двете земји. Спогодбата предвидува барање на можни области за соработка во сферата на индустријата, земјоделството, превозот, телекомуникациите, туризмот, трговијата и инвестирањето.

(Разни извори - 18.01.12-26.01.2012)