Бизнис: ФИАТ ќе го зголеми производството во Србија

30/07/2010

ФИАТ планира да инвестира една милијарда евра во својата фабрика во Застава. Исто така во бизнис вестите: германска АТКС интернешнал Тирана гради индустриски парк во Албанија и десет милиони луѓе ги посетија одморалиштата во јужниот дел од Турција.

ФИАТ планира да го префрли производството во Србија. [Getty Images]

ФИАТ планира да го префрли производството на два од своите модели во Србијa, поради тензиите со синдикатите во Италија, рече во средата (28-ми јули) генералниот директор Серџо Марчоне. Минатата недела ФИАТ објави дека ќе инвестира 1 милијарда евра во својата фабрика „Застава“ во Србија. Фабриката ќе ги произведува двата модели за европскиот и рускиот пазар во 2012 година.

***

Романијa го претстави својот нов туристички слоган „Истражете ја Карпатската градина“ во четвртокот (29-ти јули) во својот павилјон на Светскиот експо 2010 во Шангај. Министерката за туризам, Елена Удреа, министерот за надворешни работи, Теодор Баконешчи, и други официјални претставници присуствуваа на церемонијата.

***

Околу десет милиони луѓе го посетија јужниот турски туристички град Анталија оваа година, објави во средата (28-ми јули) министерот за култура и туризам, Ертугрул Гунај. Оваа бројка е близу до бројот на туристи кои го посетија Египет во истиот период, рече тој. Турција привлече 27 милиони туристи во 2009 година.

***

Германското претпријатие АТКС Интернешнал Тирана потпиша договор со албанското Mинистерство за економија, трговија и енергија во вторникот (27-ми јули), за изградба на индустриски парк во северниот град Шенѓин. Министерот Дритан Прифти очекува проектот да отвори околу 3.000 нови работни места во регионот. Индустрискиот парк ќе чини 17 милиони евра и ќе биде управуван од германското претпријатие, под договор за концесија.

***

Министрите за транспорт на Хрватскa, Словенија и Србијa се согласија да ја унапредат својата соработка во железничкиот транспорт на состанокот во Љубљана во понеделникот (26-ти јули). Заложбите имаат за цел да им помогнат на трите земји подобро да го искористат коридорот ИКС -- кој ќе ги поврзува Германија и Турција. Железничките претпријатија на трите земји ќе формираат заеднички субјект, со седиште во Љубљана.

(Разни извори -- 23/07/10-30/07/10)