Наука и технологија: Романија и Бугарија потпишаа договор

21/12/2009

Бугарија и Романија потпишаа повеќестран договор за соработка. Исто така во вестите од науката: албанските народни песни се сега на располагање во дигитална форма и Србија доби заем од 200 милиони евра.

Бугарија и Романија потпишаа договор за соработка. [Getty Images]

Романскиот државен секретар за европски прашања, Богдан Мазуру, и бугарскиот амбасадор во Букурешт, Валентин Радомирски, потпишаа програма за соработка помеѓу двете земји. Истата ги покрива образованието, науката, културата, масовните медиуми, младите и спортот до 2012 година.

***

Aлбанските народни песни се сега на располагање во дигитална форма во Институтот за културна антропологија. Создавањето на новиот формат на песни од раниот 20-ти век беше резултат на богатата архива на институтот. Проектот е поддржан од австриската Агенција за развој.

***

Европската инвестициска банка одобри заем од 200 милиони евра за Србијa, за научниот и технолошкиот развој, објави на 14-ти декември вицепремиерот Божидар Ѓелиќ. Тој рече дека 25 милиони евра грант од ЕУ ќе бидат додадени на овие средства и ќе ѝ овозможат на земјата двојно да ги зголеми своите инвестиции во научниот и технолошкиот развој, олеснувајќи ги новите истражувања и подобрувајќи ги животните услови на истражувачите.

***

Романските студенти освоија шест медали -- една златна, две сребрени и три бронзени -- на 6-тата Меѓународна јуниорска научна Олимпијада во Баку, Азербејџан, претходно овој месец. Натпреварувачите на Олимпијадата имаа три тестови: хемија, биологија и физика. Скоро 260 ученици од 47 земји учествуваа на натпреварот.

***

Технолошкиот парк Вараждин и Центарот за исчезнати и експлоатирани деца (ЦНЗД) во Осиек отпочнаа проекти за заштита на децата на Интернет. Хрватскиот град Вараждин, ЦНЗД и паркот потпишаа договор за соработка, како дел од проектите „Побезбеден интернет во училиштата“ и „Веб-директиви“. Овие проекти гарантираат 100 отсто сигурен интернет во училиштата во Вараждин. Последните истражувања спроведени во Осиек покажуваат дека онлајн контактите меѓу децата и педофилите се зголемил за годишна стапка од 40 до 60 отсто.

***

Кипар се најде на врвот на листата според инсталацијата на системите за соларна енергија за топла вода, рече министерот за комерцијална индустрија и туризам, Антонис Пашалидес на 14-ти декември. Говорејќи на вториот Годишен генерален состанок на здружението за ветрова енергија во Кипар, Пашалидес, исто така, објави дека земјата е шеста во ЕУ во однос на својот инсталиран капацитет на фотоволтажни системи по глава на човек, со вкупен инсталиран капацитет од 3 мегавати.

(Разни извори – 14/12/09-21/12/09)