Дипломатски дневник: Јеремиќ во посета на САД

15/12/2009

Претставниците на Србија и САД разговараа за соработката. Исто така во дипломатските вести: црногорскиот премиер Мило Ѓукановиќ го посети Ватикан, а хрватскиот претседател Месиќ беше во Русија.

Српскиот министер за надворешни работи, Вук Јеремиќ, во вторникот (15-ти декември) се состана со американскиот државен секретар Хилари Клинтон. [Getty Images]

Српскиот министер за надворешни работи, Вук Јеремиќ, во вторникот (15-ти декември) отпатува за Вашингтон, каде што се состана со американската државна секретарка Хилари Клинтон и други официјални претставници. Јеремиќ вели дека разговорите ќе се фокусираат на билатералната соработка. Пред да замине за Вашингтон српскиот највисок дипломат се состана со босанскиот колега Свен Алкалај и турскиот Ахмет Давутоглу во Сараево.

***

Црногорскиот премиер Мило Ѓукановиќ во понеделникот (14-ти декември) ја отпочна посетата на Ватикан, каде што ќе го посети папата Бенедикт Шеснаесетти и ватиканскиот државен секретар Тарцисио Бертоне. Црногорскиот премиер рече дека Подгорица добила целосна поддршка од папата за нејзините напори за одржување на мирот во регионот и промовирање на дијалогот меѓу религиите и културите. Светата Столица ја поддржува кандидатурата на Црна Гора и другите балкански држави за влез во ЕУ и НАТО, додаде тој.

***

Шпанија, која го презеде ротирачкото претседателство на ЕУ на 1-ви јануари, ќе стори сé што е во нејзина моќ за да ѝ помогне на Србијa во нејзиниот процес на интеграција во ЕУ, рече шпанскиот министер за надворешни работи, Мигуел Ангел Моратинос, во саботата (12-ти декември) во Белград, по состанокот со својот српски колега Вук Јеремиќ. За време на посетата на Белград, Моратинос се состана и со претседателот Борис Тадиќ и доби титула на почесен граѓанин на Белград.

***

Папата Бенедикт Шеснаесетти го прими албанскиот премиер Сали Бериша во петокот (11-ти декември), на разговори околу актуелните меѓународни прашања. Бериша го покани папата да ја посети Албанија следната година, и да учествува на прославите по повод 100-тата годишнина од раѓањето на Мајка Тереза.

***

Хрватскиот претседател Стипе Месиќ во неделата (13-ти декември) допатува во дводневна официјална посета на Русија. Месиќ се состана со претседателскиот претставник во Централниот федерален округ, Георги Полтавченко. Во понеделникот хрватскиот претседател имаше обраќање на форумот наречен „Хрватска 2000-2010, деценија на промени“, во организација на руското Министерство за надворешни работи. Месиќ, исто така, се состана со премиерот Владимир Путин и претседателот Дмитри Медведев.

***

Aлбанскиот претседател Бамир Топи и неговиот турски колега Абдула Ѓул во четвртокот (10-ти декември) вети дека ја зајакне и онака добрата политичка и економска соработка меѓу нивните држави. Топи ѝ се заблагодари на Турција за поддршката на напорите на Албанија да стане членка на НАТО и рече дека ги цени инвестициите на Турција во патната инфраструктура, индустријата, образованието, банките и телекомуникациите.

***

Португалскиот министер за одбрана, Аугусто Сантос Силва, во понеделникот (14-ти декември) изјави дека Косовo има европска перспектива и треба да се интегрира во ЕУ и НАТО, како и сите други земји од Западен Балкан. „Португалија е посветена на стабилноста и безбедноста во Косово и нема да има промени во нејзиното мировничко присуство“, рече Силва во Приштина, по состанокот со претседателот Фатмир Сејдиу.

***

Претседателот на ЕУ Херман ван Ромпуј во понеделникот (14-ти декември) беше во Софија, во прва официјална посета на Бугаријa. Ромпуј, кој се состана со премиерот Бојко Борисов и претседателот Георги Парванов, ги поздрави напорите на новата влада за решавање на економската ситуација во земјата, велејќи: „Бугарија се врати на вистинскиот пат“.

(Разни извори -- 08/12/09-15/12/09)