Култура и спорт: Копија на Берлинскиот ѕид сега и во Белград

04/11/2009

Картонската копија на Берлинскиот ѕид во Белград ја одбележа 20-годишнината од неговиот пад. Исто така во вестите од културата: њујоршкиот џез-пејач Мајлс Грифин го отвори петтото издание на Приштинскиот џез-фестивал, и Сплит беше домаќин на Деновите на француската култура.

Белград доби картонска копија на Берлинскиот ѕид. [Getty Images]

Германскиот уметник Франк Ботлер ја подигна картонската копија на Берлинскиот ѕид во центарот на Белград по повод 20-годишнината од неговиот пад. Според Ботлер, белградскиот плоштад Република, претставува најдобрата локација за конструкцијата висока 3 метри и долга 14 метри, поради конфликтите во 1990-тите на Балканот. Случајните минувачи можат да цртаат графити на ѕидот пред неговото симболично рушење в понеделник (9-ти ноември).

***

Њујоршкиот џез-вокалист Мајлс Грифин го отвори петтото издание на Приштинскиот џез фестивал во неделата (1-ви ноември), пеејќи заедно со словенечките, српските и австриските вокалисти и групата ЏР5+. Само една косовска група ќе настапи на десетдневниот настан, на која доминираат американски и западноевропски групи и џез-музичари.

***

Сплит, во Хрватскa, беше домаќин на Деновите на француската култура и 16-тите Вечери на шансоната од четвртокот (29-ти октомври) до неделата. На настанот беа прикажани филмови, предавања, изложби и театарски работилници. Истиот беше организиран од неколку културни институции во Хрватска и странство и беше поддржан од Француската амбасада во Загреб.

***

Документарниот филм „Довидување, како сте?“ на српскиот режисер Борис Митиќ, ја освои наградата за најдобар среднометражен филм на 5-тиот Меѓународен фестивал на документарниот филм во Мексико ДОЦСДФ. Околу 148 филмови од повеќе од 40 земји беа прикажани на фестивалот, кој се одржа од 15-ти октомври до 24-ти октомври.

***

Пар чевли кои ѝ припаѓале на поп-легендата Мадона, беа продадени за 10.000 евра на добротворната вечер по повод Ноќта на вештерките во Букурешт во саботата (31-ви октомври). Пејачката одлучи да ги стави на аукција едни од своите омилени чевли на Кристијан Диор, за собирање пари за образование на сиромашните деца во Романија.

***

Фестивалот на Народниот театар беше отворен во Букурешт во саботата (31-ви октомври). Настанот вклучуваше 90 различни настани, вклучително и 21 театарска претстава, презентации на книги и конференции. Настанот завршува на 8-ми ноември.

***

Министрите за култура на Србија, Босна и Херцеговина и Хрватска во понеделникот (2-ри ноември) постигнаа согласност во Сараево да работат заеднички на вклучување на средновековни надгробни плочи познати како „стечи“ на листата на УНЕСКО на светското наследство. Плочите „стечи“ ги има низ целиот регион. Тие се посебни поради своите декоративни мотиви, како спирали, розети, лозови листови и грозје. Се верува дека тие датираат од 12-тиот век и се поврзуваат со босанската црква.

(Разни извори – 28/10/09-04/11/09)