Бизнис: Обновена железничка пруга

23/10/2009

По скоро две децении, железничката пруга помеѓу главните градови на Србија и Босна и Херцеговина е повторно отворена. Исто така во бизнис вестите: Македонија доби 66 нови ветерници и косовското претпријатие за моторни возила е новиот официјален дилер на „форд“, „ленд ровер“ и „нисан“.

Билетот за воз од Сараево за Белград ќе чини 25 евра. [Getty Images]

Железничките власти на Босна и Херцеговинa и Србија во вторникот (20-ти октомври) се договорија да ја обноват, по 18-годишен прекин, директната железничка линија Сараево-Белград-Сараево, почнувајќи од 13-ти декември. Билетот во еден правец чини 25 евра, а патувањето трае осум и пол часа.

***

Инсталирањето на 66 ветерници во близина на Штип, во Maкедонијa, се очекува да почне во пролет 2010 година. Шпанското претпријатие Инвал ги испита можностите за користење на ветровата енергија за производство на електрична енергија во земјата.

***

Maкедонијa ќе воведе забрана за пушење во кафулиња и ресторани почнувајќи од 1-ви јануари 2010 година. Според сегашните регулативи, пушењето е дозволено само во 50 отсто од просторот, но законот не е влезен во сила. Пушачите кои ќе ја прекршат забраната по 1-ви јануари 2010 година ќе бидат парично казнети со 300 евра, а сопственикот на кафулето или ресторанот ќе биде казнет со 2000 до 4000 евра.

***

Мисијата на ММФ пристигна во четвртокот (22-ри октомври) во Белград за истовремено втор и трет преглед на стенд-бај аранжманот од 2,92 милијарди евра со земјата. Мисијата ќе остане во Србија до 4-ти ноември. Заклучоците на експертите ќе одлучат дали да бидат исплатени преостанатите 1,2 милијарди евра од заемот кој Србија треба да го добие оваа година.

***

Европската банка за реконструкција и развој вели дека економијата на Aлбанија ќе забележи раст од 3 отсто во 2009 година. Првите шест месеци беа силни за земјата со 4-5 отсто раст, додека втората половина од годината ќе биде значително полоша, со очекуван пад од 1,6 отсто, рече шефот на канцеларијата на ЕБРД во Тирана, Даниел Берг, во вторникот (20-ти октомври).

***

Косовското претпријатие за моторни возила ќе биде официјален локален дилер на „форд“, „ленд ровер“ и „нисан“, објавија во понеделникот (19-ти октомври) претставниците на претпријатието. Тие додадоа дека нивните идни планови треба да обезбедат одржување и сервис на автомобилите за трите бренда.

***

Романијa ќе се соочи со раст на цените по претседателските избори на 22-ри ноември, предупредува извештајот на Прајсвотерхаускуперс во средата (21-ви октомври). Предвидувањата се драстични, бидејќи цената на струјата се очекува да порасне за околу 30 отсто, а цените на горивото за најмалку 20 отсто. Цените на цигарите се очекува да се зголемат за 34 отсто.

(Разни извори – 16/10/09-23/10/09)