Култура и општество: Романија го освои Шаховскиот куп

01/07/2009

Романскиот шаховски велемајстор Нисипеану победи во Франција. Исто така во вестите од културата: албанскиот писател Кадаре е добитник на наградата за литература Астуриас 2009, и турската влада му врачи признание на историчарот Кемал Карпат.

Романскиот шахист Ливиу Диетер Нисипеану победи на францускиот Шаховски куп. [Getty Images]

Меѓународниот велемајстор Ливиу Диетер Нисипеану, моментно најдобар романски шахист и поранешен европски шампион, победи на францускиот Шаховски куп во неделата (28-ми јуни) како дел од францискиот тим Кличи ечекс 92, објави Agerpres. Кличи ечекс 92 го победи Иври Гранд Рок со 3:1. Нисипеану игра професионално за различни клубови во Романија, Франција и Германија.

***

Познатиот албански писател Исмаил Кадаре ја доби наградата за литература Астуриас 2009 на 24-ти јуни. Наградата ја доделува секоја година Принцот на фондацијата Астуриас, предводена од шпанскиот престолонаследник, принцот Фелипе, на поединци или институции чие креативно дело или студии даваат придонес во универзалната култура.

***

Историчарот Кемал Карпат ја освои почесната награда на турскиот парламент за 2009 година за „извонредни достигнувања на меѓународната сцена и придонес во промовирањето на Турција во светот“, објави весникот Ватан во петокот (26-ти јуни). Карпат е специјалист за отоманската историја и е моментно професор на Универзитетот во Висконсин.

***

Изложба посветена на Бугаријa во Првата светска војна, беше отворена во Виенскиот музеј за воена историја на 24-ти јуни, објави Софиската новинска агенција. Изложбата е насловена како „Непознат сојузник - Бугарија во Првата светска војна“ и ќе трае до февруари 2010 година. Истата содржи различни предмети како што се униформи, оружје, документи, фотографии и каталог.

***

Новиот музеј Акропол во Aтина привлече повеќе од 90.000 посетители првите седум дена по официјалното отворање на 20-ти јуни, рече грчкиот министер за култура Антонис Самарас во понеделникот (29-ти јуни). Во просек околу 11.000 билети беа продадени преку Интернет продажбата на веб-страницата на музејот во првите пет дена. Министерот објави дека музејот ќе биде отворен од 8 часот наутро до 8 часот навечер цела година.

***

Оркестарот ДИАКО од Ѓаково, Хрватскa, беше прогласен за најдобар тамбурашки оркестар во светот на Вториот светски фестивал на тамбура 2009 во Дероње, Србијa, кој се одржа од петокот (26-ти јуни) до неделата.

(Разни извори -- 24/06/09-01/07/09)