Дипломатски дневник: Црна Гора и Косово ќе воспостават дипломатски врски

06/01/2009

Косово наскоро ќе отвори амбасада во Црна Гора. Исто така во дипломатските вести: делегација на косовскиот парламент ја посети Турција и српскиот претседател Борис Тадиќ се залага за добри регионални надворешни односи.

Косово сака да има пријателски односи со сите свои соседи, рече претседателот Фатмир Сејдиу. [Getty Images]

Косовскиот претседател Фатмир Сејдиу во понеделникот (5-ти јануари) рече дека постои взаемна подготвеност за воспоставување дипломатски врски помеѓу Црна Гора и Косово и за отворање косовска амбасада во Подгорица наскоро. „Имавме директни разговори за ова со црногорскиот претседател Филип Вујановиќ и министерот за надворешн работи Милан Рочен, но датумот на кој ова ќе се случи не е сé уште познат“, рече Сејдиу во интервју за подгоричкиот весник Вијести. Тој додаде дека Косово сака да има пријателски односи со сите свои соседи, вклучително и Србијa. Сејдиу рече дека секој кој некогаш живеел во Косово има право да се врати и вети дека оние што сакаат да го сторат тоа ќе добијат најдобар можен третман.

***

Сирискиот министер за надворешни работи, Валид ал-Миалем, во неделата (4-ти јануари) пристигна во работна посета на Tурција. Во понеделникот тој се состана со својот турски колега Али Бабаџан и премиерот Реџеп Тајип Ердоган во Анкара, на разговори околу неодамнешните настани во регионот, особено израелската офанзива во Појасот Газа. Ал-Муалем, исто така, се состана со претседателот Абдула Ѓул.

***

Грчкиот премиер Костас Караманлис во вторникот (6-ти јануари) присуствуваше на традиционалните церемонии на островот Китира, за Богојавление. Богојавление е еден од најголемите празници за православните христијани. На овој ден, сите бродови и водите по кои пловат се благословуваат.

***

Делегација на косовскиот парламент во понеделникот (5-ти јануари) замина во петдневна официјална посета на Tурција. Делегацијата, предводена од претседателот на парламентот, Јакуп Красниќи, ќе се состане со турскиот претседател Абдула Ѓул, премиерот Реџеп Тајип Ердоган, претседателот на парламентот, Коксан Топтан, и други високи претставници, како дел од серијата разговори во Анкара и Истанбул.

***

Српскиот претседател Борис Тадиќ во саботата (3-ти јануари) изјави за Фонет дека односите помеѓу неговата земја и соседна Maкедонија, Црна Г oра и Хрватскa треба да бидат што е можно подобри. Тој истакна дека Србија е земја која цврсто стои зад својот територијален интегритет, суверенитет и дигнитет и има намера да ја одржува оваа политика и да се воздржи од предизвикување тензии во регионот.

***

Tурскиот премиер Реџеп Тајип Ердоган во неделата (4-ти јануари) ја заврши својата дипломатска турнеја низ Блискиот Исток. За време на посетата, која започна на 31-ви декември, Ердоган ги посети Сирија, Јордан, Египет и Саудиска Арабија, каде што разговараше за напорите во преговорите за прекин на огнот во Газа по израелските напади.

(Разни извори -- 30/12/08-06/01/09)