Култура и спорт: Ѓоковиќ победи на Мастер купот во Шангај

19/11/2008

Тениската ѕвезда Новак Ѓоковиќ од Србија победи на Мастер купот во Шангај. Исто така во вестите: во Загреб е отворен Меѓународниот саем на книгата и наставните помагала, Интерлибер 2008, и косовски документарен филм е добитник на наградата за најдобар краткометражен документарен филм на филмскиот фестивал во Хамбург.

Тениската ѕвезда Новак Ѓоковиќ од Србија го прославува брејкот против Николај Давиденко од Русија во Шангај. [Getty Images]

Водечкиот српски тенисер, Новак Ѓоковиќ, победи на Мастер купот во Шангај во неделата (16-ти ноември). Тој го порази Русинот Николај Давиденко со 6:1 и 7:5. Ова е втора голема титула за Ѓоковиќ оваа година. Тој победи на Отвореното првенство во Австралија во јануари.

***

Хрватскиот министер за култура, Божо Бискупиќ, го отвори Меѓународниот саем на книгата и наставните помагала Интерлибер 2008, на 12-ти ноември. На настанот, кој заврши во неделата (16-ти ноември) учествуваа претставници од Србијa, Босна и Херцеговинa, Австрија, Белгија, Иран, Израел, Германија, Полска, Соединетите Држави, Шпанија и Велика Британија. Овогодинешна партнерска земја на саемот беше Израел.

***

Косовскиот документарен филм Воз на слободата ја освои наградата на најдобар краткометражен документарен филм на филмскиот фестивал Радар во Хамбург. Петрит Пула е продуцент, а Карина Кореа од Колумбија го сними документарниот филм. Истиот се однесува на историјата на косовската железница и транзициите со кои таа се соочи.

***

Документарниот филм за број еден тенисерката во светот, Јелена Јанковиќ, беше премиерно прикажан во Белград на 12-ти ноември. Светот на Јелена ја раскажува приказната за нејзиниот живот и кариера.

***

Филмот Време на кометата, албанско-косовскo-германската продукција, се прикажува за време на 49-тото издание на Солунскиот филмски фестивал, кој започна во петокот (14-ти ноември) и завршува во неделата (23-ти ноември). Авторите на филмот аплицираа за номинација во категоријата за најдобар филм од странското говорно подрачје на Оскарите 2009.

***

Tурција и Унгарија потпишаа протокол за културна соработка на 13-ти ноември во Анкара. Потписници се нивните министри за култура, Ертугрул Гунај и Истван Хилер. Протоколот предвидува студентска размена и подобра културна соработка.

***

Tурскиот машки тим освои златен медал во кумите на 19-тото Светско карате првенство во Токио во петокот (14-ти ноември). Турскиот тим го порази Египет во полуфиналето и Србијa во финалето.

(Разни извори – 12/11/08-19/11/08)