Наука и технологија: Охрид е домаќин на Меѓународниот летен универзитет

14/07/2008

Во Охрид беше отворен Меѓународниот летен универзитет. Исто така во вестите: српските археолози откопаа артефакти на локалитет во средновековен град и Музејот на град Букурешт беше домаќин на астрономската изложба.

Во Охрид започна Меѓународниот летен универзитет. [Getty Images]

Во понеделникот (7-ми јули) во Oхрид беше отворен Меѓународниот летен универзитет, на кој ќе учествуваат околу 350 учесници од Македонија и од странство. Програмата на универзитетот нуди 12 курсеви по социјалните науки, кои ќе траат до недела (20-ти јули).

***

Тим српски aрхеолози предводен од Јованка Клајиќ откри два скелети во неделата (6-ти јули), кои треба да откријат нешто повеќе за српскиот средновековен главен град, Стари Рас, во близина на Нови Пазар. Скелетите се долги по 1,93 метри, односно луѓето биле високи повеќе од 2 метри. Копајќи повеќе од две децении, археолозите открија две цркви, една капела, една палата и други предмети што ја докажуваат локацијата на Стари Рас.

***

Институтот за технички науки при српската Aкадемија на науките и уметностите во вторникот (8-ми јули) го објави потпишувањето на договор за соработка во областа на културата, образованието и науката со Католичкиот универзитет на Бразилија.

***

Maкедонските aрхеолози открија статуа на Венера од третиот век во близина на античкиот град Скупи. Статуата е висока 170 сантиметри. Скопскиот музеј ќе ја изложи истата по реставрирањето.

***

Астрономската изложба насловена како „Универзум во градскиот центар“ беше отворена во понеделникот (7-ми јули) во градскиот музеј на Букурешт. Изложбата ги опфаќа клучните фази во развојот на астрономијата и дава приказ на соларниот систем, галаксиите и соѕвездијата, како и презентација на митологијата поврзана со најпознатите констелации.

***

Во септември грчкиот Фонд за здравствено осигурување ќе почне да нуди бесплатна вакцинација против цервичниот рак за девојчиња на возраст од 12 до 15 години, објави грчкото Министерство за здравство. Голем број земји сé уште не ја вовеле новооткриената вакцина.

(Разни извори – 07/07/08-14/07/08)