Бизнис: Седум претпријатија поднесоа понуди за откупување на преостанатите акции на Телеком Србија

30/05/2008

Српското претпријатие Телеком Србија ќе ги продава преостанатите акции на првичната јавна понуда. Исто така во бизнис вестите оваа недела: Турција ќе добие заем од 600 милиони американски долари од Светската банка и Црна Гора воведе еко-даноци за странските возила што влегуваат во земјата оваа година.

[EУ]

Седум претпријатија поднесоа понуди за откупување на преостанатите акции во првата јавна понуда на српското претпријатие Телеком Србија. Тоа се: Ситигруп, Мерил Линч, Голдмен Саш, Морган Стенли, конзорциум на Рајфајзен бенк и Дојче бенк, конзорциум предводен од Џеј Пи Морган и Кредит Свис, објави во вторникот (27-ми мај) српската агенција за приватизација. Победникот ќе биде обелоденет на крајот од јули или август.

***

Светската банка го одобри извозниот заем од 600 милиони американски долари за Турција, рече во понеделникот (26-ти мај) Улрих Закау. Заемот се очекува да го зголеми капацитетот и конкурентноста на локалните извезувачи, обезбедувајќи им среднорочен и долгорочен работен капитал и инвестициско финансирање. Турската банка за индустриски развој и Експорт-кредит банк од Турција ќе го исплатат заемот.

***

Министерството за туризам на Црна Гора во понеделникот (26-ти мај) го објави новиот еко-данок за сите странски возила кои ќе влезат во земјата ова лето, во обид за зачувување на животната средина. Данокот, кој ќе почне да се наплаќа од 15-ти јуни, ќе изнесува 10 евра за автомобилите и минибусите и од 30 до 150 евра за камионите, автобусите и другите големи возила.

***

Европската комисија (ЕК) ќе ја предводи Донаторската конференција за Косовo на 11-ти јули, објави канцеларијата на ЕК во Приштина во средата (28-ми мај). По повиците од владата за конкретни проекти што ќе може да добијат странска помош, општините поднесоа 357 проекти во инфраструктурата, образованието, здравството, земјоделството и туризмот, објави ЕК.

***

Aлбанското Mинистерство за економија, трговија и енергија го стави на продажба дистрибутивниот оддел на албанското претпријатие за електростопанство, КЕШ, објави во четвртокот (29-ти мај) Фајненшал тајмс. Министерството ќе продаде од 51 до 76 отсто од дистрибутивното претпријатие на стратешки инвеститор за да ги минимизира загубите на претпријатието.

***

Бугарското државно претпријатие за електростопанство, НЕК, во средата (28-ми мај) ги покани понудувачите кои влегоа во потесниот избор на тендерот за 49 отсто од втората бугарска нуклеарка (Белене), да ги поднесат своите понуди до 23-ти јуни. Понудувачи за проектот вреден 4 милијарди евра се германското претпријатие РВЕ и белгиски Електрабел. Нуклеарката од 2.000 мегавати треба да биде пуштена во употреба до 2013 или 2014 година.

(Разни извори – 23/05/08-30/05/08)