Култура и спорт: Турција планира да постави статуа во спомен на новинарот

21/05/2008

Истанбул планира да подигне статуа на гулаб, посветена на убиениот новинар Хрант Динк. Исто така во културата оваа недела: Подгорица беше домаќин на меѓународниот саем на книгата и делата на Пикасо беа изложени во Скопје.

Статутата ќе биде подигната во знак на сеќавање на убиениот новинар Хрант Динк. [Getty Images]

Статуа на гулаб, симболот на мирот, ќе биде подигната во Истанбул, на местото каде што беше убиен истакнатиот турски новинар Хрант Динк. Турскиот скулптор Мехмет Аксој вели дека добил инспирација од реченицата што Динк ја напишал една недела пред неговиот атентат на 19-ти јануари 2007 година: „Гулабите не се убиени во оваа земја“.

***

Романското Министерство за култура објави дека ќе даде субвенции во висина од 175.000 евра во седум области од културата. Субвенции од по 25.000 евра се наменети за секоја од нив -- ликовната уметност, архитектурата, пластичните уметности, филмот и телевизијата, литературното истражување, музиката и театарот.

***

Подгорицa беше домаќин на меѓународниот саем на книгата кој заврши во понеделникот (19-ти мај). На саемот присуствуваа околу 100 издавачи и книжарници од Кина, Франција, Иран, Италија и земјите од Југоисточна Европа.

***

Романска изложба на 1.112 уметнички дела од неолитскиот период, беше отворена во Олтен, Швајцарија, од 2-ри до 15-ти јуни. Изложбата, организирана од Романскиот национален историски музеј, ќе биде најголема романска изложба од ваков вид во странство. Истата содржи артефакти од 31 музеј низ целата земја.

***

Уметничкото творештво на Пабло Пикасо беше прикажано во Скопјe во рамките на Ноќите на музеите во петокот (16-ти мај). Пикасовите „Глава на жена“ и „Танцот на сатирите“, беа дел од иницијативата. „Главата на жена“ е од Музејот на современа уметност во Скопје. Истата е добиена како подарок од Пикасо по катастрофалниот земјотрес во Македонија во 1964 година. „Танцот на сатирите“ е во сопственост на анонимен македонски колекционер.

***

Петтото издание на филмскиот фестивал Авангарда се одржа од 14-ти мај до четврток (22-ри мај) во Aтина. Настанот беше заедничка иницијатива на општината Атина, Австриската амбасада, Атинското училиште за ликовна уметност, Грчката филмска архива и Институтот Гете.

***

Деновите на српскиот филм започнаа во петокот (16-ти мај) во Лисабон. Настанот, кој ќе трае до 30-ти мај, беше отворен со прикажувањето на филмот „Подземје“ на српскиот режисер Емир Кустурица. На настанот ќе бидат прикажани десет филмови.

(Разни извори – 14/05/08 - 21/05/08)