Бизнис: Родос изгласан за најдобра европска туристичка дестинација

09/05/2008

Корисниците на популарен интернет сервис го избраа грчкиот остров за свое омилено место за патување во Европа. Исто така: Телеком Српске на Република Српска оствари 14 милиони евра профит.

Родос. [Архива]

Грчкиот остров Родос беше изгласан за најдобра туристичка дестинација во Европа и петта во светот, во истражувањето што го спроведе интернет патничкиот сервис Трип адвајзор. Резултатите се базираат на препораките на членовите на страницата. Австрија е втора, по Родос.

***

Главниот телеком оператор во Република Српска, Телеком Српске, оствари нето профит од 14 милиони евра во првото тримесечје од годинава. Според финансиската изјава објавена во средата (7-ми мај) приходите на претпријатието достигнаа 54 милиони евра од јануари до март, додека трошоците достигнаа 38 милиони евра, а 2 милиони беа платени во даноци. Приватизацијата на Телеком Српске беше најуспешниот ваков договор што беше спроведен во Босна и Херцеговинa минатата година.

***

Европската комисија одобри 143 милиони евра државна помош за Форд, новиот сопственик на романскиот производител на автомобили Аутомобиле Крајова. Парите се наменети за унапредување на производството.

***

Европската банка за реконструкција и развој додели нова кредитна линија од 5 милиони евра за финансирање на мали и средни претпријатија во Maкедонијa. Претпријатијата ќе можат да ги користат парите за инвестиции, за купување опрема и за целосен развој.

***

Загреб во средата (7-ми мај) беше домаќин на Меѓународната конференција за економски трендови, која се фокусираше на развојот на финансиската индустрија и економија на земјата. Настанот, организиран од Хрватското здружени на работодавачи, Хрватското здружение на банкари и хрватско-австриската Стопанска комора, заврши со заклучок дека Хрватска ги чувствува последиците од глобалната економска криза, високите цени на нафтата и севкупниот надолен тренд на светските берзи.

(Разни извори – 02/05/08-09/05/08)