Наука и технологија: Реновирано крило на хрватска болница за идентификување на воените жртви

31/03/2008

Одделот за патологија на една хрватска болница ќе добие реновирано крило. Исто така во вестите оваа недела: Црна Гора го менува својот интернет домен и албанската и турската влада потпишаа договор за соработка.

Клиниката во Сплит, Хрватска, користи ДНК анализи за идентификување на воените жртви од цела Европа. [Getty Images]

Хрватскиот министер за наука, образование и спорт, Драган Приморац, во вторникот (25-ти март) го отвори реновираното крило на сплитскиот оддел за патологија, кој е опремен со лабораторија за клиничка и судска генетика. Од 1994 година лабораторијата користи ДНК за идентификување на жртвите од остатоците пронајдени во масовните гробници низ цела Европа.

***

Црна Гора ја започна промената од интернет доменот .cg.yu во доменот .me во вторникот (25-ти март). Промената во новиот домен ќе биде бесплатна за сите корисници. Стариот домен ќе биде активен до 21-ви април.

***

Aлбанскиот министер за образование и наука, Генц Поло, и неговиот турски колега, Хусејин Челик, во средата (26-ти март) потпишаа договор за заедничката програма за соработка во образованието, науката, културата и уметноста. Договорот беше потпишан за време на посетата на <b>турскиот<b> премиер Реџеп Тајип Ердоган на Тирана.

***

Бугарската Државна агенција за информатичка технологија и комуникации обезбеди бесплатен интернет пристап за професорите и студентите на Државниот колеџ за телекомуникации и пошти како подарок по повод 85-годишнината од инситуцијата. Агенцијата ги покани професорите да ја користат експерименталната лабораторија со нова генерација интернет протокол, која беше отворена на почетокот од март.

***

Само 70 отсто од индустриските претпријатија во Федерацијата на Босна и Херцеговина (ФБиХ) имаат еколошки лиценци, објави во средата (25-ти март) Томислав Лукиќ, советникот за животна средина при Министерството за животна средина и туризам. Тој додаде дека ФБиХ издаде 400 нови лиценци во изминатата година и потврди дека крајниот рок за нивно обновување е јануари 2010 година.

***

Тридневен Циско експо 2008 се одржа во Сараево почнувајќи од средата (26-ти март). На настанот присуствуваа околу 100 Циско партнери од јавните претпријатија и водечките странски фирми во Босна и Херцеговинa.

***

Хрватскиот производител на телеком опрема Ериксон Никола Тесла (ЕНТ) склучи договор од 1,1 милиони евра за опрема за Косовското претпријатие за пошти и телекомуникации. ЕНТ вели дека и покрај напнатата политичка ситуација во Косово, пазарот на ИТ има огромен потенцијал.

(Разни извори – 24/03/08 - 31/03/08)