Дипломатски дневник: Словенија ги поддржа аспирациите на Македонија за влез во ЕУ

05/02/2008

Словенечкиот министер за надворешни работи, Димитриј Рупел, минатата недела беше во Скопје. Исто така во дипломатските вести: Романија и Франција потпишаа договор за стратешко партнерство.

Словенечкиот министер за надворешни работи, Димитриј Рупел (лево), и неговиот македински колега, Антонио Милошоски, во петокот (1-ви февруари) одржаа прес-конференција во Скопје. [Getty Images]

Словенечкиот министер за надворешни работи, Димитриј Рупел, ја потврди поддршката на неговата земја за евроатланската интеграција на Maкедонија, за време на посетата на Скопје во петокот (1-ви февруари). Рупел, чија земја претседава со ЕУ, се состана со својот македонски колега, Антонио Милошоски, и рече дека разговорите за пристап, најверојатно, ќе започнат оваа година.

***

Романскиот претседател Трајан Башеску и францускиот претседател Николас Саркози потпишаа петгодишен договор за статешко партнерство, прв ваков документ потпишан помеѓу Франција и земјите од Источна Европа. Договорот предвидува соработка во политичката, економската и културната сфера.

***

Латвија, прва членка на ЕУ што го ратификуваше Договорот за стабилизација и асоцијација (ДСА) на Aлбанија со ЕУ, во понеделникот (4-ти февруари) ја потврди својата поддршка за интеграцијата на Албанија во НАТО. Амбасадорот на Латвија во НАТО, Јанис Ајхманис, се состана со албанскиот претседател Бамир Топи и премиерот Сали Бериша.

***

Грчката министерка за надворешни работи, Дора Бакојани, на 14-ти февруари ќе допатува во Вашингтон, на состанок со американскиот државен секретар Кондолиза Рајс, објави грчкото Министерство за надворешни работи. Рајс и Бакојани се очекува да разговараат за спорот околу името помеѓу Атина и Скопје, пред самитот на НАТО во Букурешт во април.

***

Саудиска Арабија го почитува територијалниот интегритет на Кипар, рече во понеделникот (4-ти февруари) министерот за надворешни работи на Саудиска Арабија, Сауд Ал Фаисал, за време на состанокот со неговиот кипарски колега, Ерато Козаку Маркулис, кој е во еднодневна официјална посета на Ријад. „Го поддржуваме обединетиот и федерален остров и се противиме на какво било отцепување или поделба“, рече Ал Фаисал.

***

Шефот на Комитетот за Југоисточна Европа на Европскиот парламент (ЕП), Дорис Пак, во понеделникот (4-ти февруари) и вторникот беше во Сараево. Таа присуствуваше на 10-тиот меѓупарламентарен состанок со членовите на Заедничкиот комитет за европска интеграција на парламентот на Боснa и Херцеговина.

***

Поранешниот германски канцелар Герхард Шредер во петокот (1-ви февруари) беше во приватна посета на Tурската Република Северен Кипар и се состана со премиерот на кипарските Турци, Ферди Сабит Сојер. Целта на посетата беше поддршка на напорите предводени од ОН за повторно обединување на островот. Претседателот на Кипар, Тасос Пападопулос, рече дека овој чекор претставува „жалосен настан“ и одби да се состане со Шредер.

***

Папада Бенедикт Шеснаесетти во саботата (2-ри февруари) се состана со косовскиот претседател Фатмир Сејдиу и разговараше за последните настани во врска со прашањето на статусот на Косово. Папата рече дека ставот на Ватикан околу декларацијата за независност ќе зависи во голема мера од меѓународната заедница. Сепак, во изјавата објавена по состанокот тој истакнува дека состанокот не бил сигнал за одобрувањето на Ватикан на напорите на Косово за независност.

(Разни извори -- 29/01/08-05/02/08)