Култура и спорт: Балкански режисер го заврши снимањето на документарецот за Марадона

21/03/2007

Новиот документарен филм на режисерот Емир Кустурица за големиот аргентински фудбалер Диего Марадона ја чека својата премиера. Исто така оваа недела: косовско-албанскиот боксер победи на Интерконтиненталниот шампионат.

Диего Марадона и Емир Кустурица на Канскиот филмски фестивал. [Getty Images]

Познатиот балкански режисер Емир Кустурица вели дека го завршил снимањето на новиот документарен филм за аргентинската фудбалска легенда Диего Марадона. Филмот, насловен како „Сетете се на Фиорито“, беше снимен на неколку локации во Буенос Аирес, Дубаи, Србија и Италија.

***

Над 300 музичари од 45 земји ќе учествуваат на 14-тиот ЕУРОПАфест, кој ќе се одржи во Букурешт помеѓу 7-ми и 13-ти мај. Истиот вклучува џез и виолински натпревари, како и концерти. Џез-форумот ќе биде прв меѓународен настан од ваков вид во Романија.

***

Десеттиот Скопски филмски фестивал беше отворен на 17-ти март во мaкедонскиот главен град со премиерата на „Марија Антоанета“ на Софија Копола. Повеќе од 100 филмови, документарни и цртани филмови ќе бидат прикажани, при што 16 од нив се натпреваруваат во главната програма. Ќе се одржат три мини форуми, насловени како Нов американски независен филм, Анима-фест и Франкофонски поглед.

***

„Делириум за двајца“, во продукција на македонскиот театар „Центар“ го освои гран прито на шестиот Меѓународен театарски фестивал во Славија во Белград. Преставата, во режија на Дејан Пројковски, ја имаше својата премиера на странска сцена само три месеци по премиерата дома. Театри од Бугарија, Хрватска, Македонија, Црна Гора, Романија, Русија и Србија учествуваа на фестивалот, кој вклучуваше и презентации на портрети на актери, изложби и концерти.

***

Боксерот Луан Красниќи, кој е роден во Косовo, а сега живее во Германија, победи на Интерконтиненталниот шампионат во тешка категорија во Штутгарт. Тој го победи Брајан Минто од САД.

***

Изложбата насловена како „Авангардните тенденции во хрватската уметност“ беше отворена во галеријата „Кловичеви двори“ во Загреб на 16-ти март, по повод одбележувањето на 25-годишнината од формирањето на институцијата. На изложбата се претставени авангардни слики, архитектура, дизајн, фотографија, литература, театар и кинематографија. Истата ќе трае до 6-ти мај.

***

Во музејот Лувр во Париз во тек е изложбата посветена на работата на грчкиот скулптор од четиринаесеттиот век п.н.е Праксителес. Истата беше официјално отворена на 19-ти март, за време на посетата на грчкиот министер за култура, Јоргос Вулгаракис, на францускиот главен град. Изложбата ќе трае до 6-ти јуни.

(Разни извори – 14/03/07-21/03/07)