Турција и ЕУ се обидуваат да стават крај на ќор-сокакот во врска со Кипар

24/10/2006

Компромисниот предлог на Финска беше предмет на расправа минатата недела. Исто така, во вестите од дипломатијата: мандатот на претставникот на ОН, Марти Ахтисари, продолжен од технички причини, и Советот на ЕУ го одобри закажаниот пристап на Бугарија и Романија.

Турскиот министер за надворешни работи, Абдула Ѓул. [Getty Images]

Tурција и ЕУ имаа разговори за финскиот предлог за ставање крај на ќор-сокакот во врска со дозволата за пристап на кипарските бродови и авиони во турските пристаништа и аеродроми. Предлогот, наводно, повикува на делумен пристап до турските пристаништа во замена за отворање на кипарското пристаниште Фамагуста, кое не се користи откако Турција го окупираше северен Кипар во 1974 година.

***

Романскиот претседател Трајан Башеску беше во официјална посета на Индија. Тој му рече на својот индиски колега, АПЛ Абдул Калам, дека Букурешт гледа во Индија свој приоритет во надворешната политика.

***

Мандатот на специјалниот претставник на ОН, Марти Ахтисари, беше продолжен до јуни 2007 година. Сепак, портпаролот на ОН рече дека продолжувањето е од технички карактер и не посочи дека разговорите за Косовo би можеле да се продолжат.

***

Британскиот амбасадор вo Maкедонијa, Роберт Чатертон Диксон, на прес-конференцијата за новинарите изјави дека македонската влада треба да се концентрира на спроведувањето реформи потребни за интеграцијата во ЕУ, наместо на конкретниот распоред за влез. Тој рече дека Велика Британија го поддржува проширувањето на ЕУ и дека Македонија ќе стане членка на ЕУ кога ќе ги исполни критериумите за членство.

***

Maкедонскиот премиер Никола Груевски го покани Ерхард Бусек, специјалниот координатор на Пактот за стабилност на Југоисточна Европа, да ја советува владата за прашањата на пристапот во ЕУ. Бусек ја прифати понудата и рече дека верува оти Македонија би можела да биде следната регионална успешна приказна, по пристапот на Бугарија и Романија во ЕУ и отпочнувањето на разговорите за членство во ЕУ со Хрватска.

***

Процесот на проверка на нивото на хармонизирање на хрватските закони со оние на ЕУ, е завршен. Европската комисија сега ќе даде препораки за отпочнување на разговорите за секое поглавје. Загреб ги отвори и привремено ги затвори преговорите за едно поглавје.

***

Командантот на КФОР, генерал-полковник Роланд Катер, се состана со началникот на црногорската армија, генерал-полковник Јован Лакичевиќ, во Подгорица, на разговори околу прашањата на билатералната соработка. Ова беше прв ваков состанок откако Подгорица прогласи независност во мај.

***

Советот на ЕУ го одобри закажаниот пристап на Бугарија и Романијa, како што беше препорачано во последниот извештај на Европската комисија (ЕК). Министрите за надворешни работи на блокот, исто така, искажаа поддршка за плановите за следење на нивните остварувања во областите како што се судските реформи и борбата против криминалот и корупцијата.

(Разни извори – 18/10/06-24/10/06)