Дипломатски дневник: Хрватска и Србија отворија граничен премин

25/07/2006

Хрватскиот премиер Иво Санадер и српскиот премиер Воислав Коштуница во петокот отворија граничен премин. Исто така во вестите од дипломатијата: Претседателот на ЕК, Жозе Мануел Баросо, се состана со српскиот претседател Борис Тадиќ и Ерхард Бусек ја посети БиХ.

Српскиот премиер Воислав Коштуница (десно) и неговиот хрватски колега Иво Санадер се поздравуваат на реконструираниот граничен премин Батровци-Бајаково помеѓу Србија и Хрватска во петокот (21-ви јули). [Getty Images]

Хрватскиот премиер Иво Санадер во петокот (21-ви јули) допатува во Белград, на состаноци со српскиот премиер Воислав Коштуница и српскиот претседател Борис Тадиќ. Тој рече дека билатералната соработка беше значително зголемена во текот на изминатата година и изрази уверување дека српскиот акционен план за соработка со Трибуналот на ОН за воени злосторства ќе донесе резултати. Санадер и Коштуница, исто така, го отворија модернизираниот граничен премин Батровци-Бајаково, кој беше кофинансиран од ЕУ.

***

Хрватскиот министер за внатрешни работи, Ивица Рачан, и неговиот словенечки колега, Драгутин Мате, се состанаа во вторникот (18-ти јули) во Ровињ, на разговори околу билатералната соработка во врска со летната туристичка сезона. Разговорите, наводно, се фокусирале на зајакнувањето на безбедноста во туристичките места во двете земји.

***

Претседателот на Европската комисија, Жозе Мануел Баросо, и српскиот претседател Борис Тадиќ се состанаа во вторникот (18-ти јули) во Брисел. Баросо рече дека Договорот за стабилизација и асоцијација помеѓу Србија и ЕУ може да биде потпишан до крајот на годинава, ако Белград го спроведе акциониот план со задоволителни резултати.

***

Специјалниот координатор на Пактот за стабилност за Југоисточна Европа, Ерхард Бусек, во средата (19-ти јули) во Сараевo се состана со главниот заменик висок претставник Лари Батлер, и со премиерот на БиХ, Аднан Терзиќ.

***

Косовскиот премиер Агим Чеку во средата (19-ти јули) пристигна во официјална дводневна посета на Словенија. Тој во четвртокот се состана со колегите Јанез Јанша, министерот за надворешни работи Димитриј Рупел, претседателот Јанез Дрновшек и претседателот на парламентот Франце Цукјати.

(Разни извори – 18/07/06-25/07/06)