Грција издаде државни обврзници за да го намали дефицитот

05/03/2010

AТИНА, Грција -- Државата понуди десетгодишни државни обврзници во четвртокот (4-ти март), во обид да подигне пари и да надомести дел од својот огромен буџетски дефицит. Само неколку часа по нивното издавање, вредноста на обврзниците достигна 7 милијарди евра; далеку повеќе од 5-те милијарди евра што се предвидуваа со анализите. Пет банки беа избрани како надлежни за понудата.

Во другите вести од четвртокот, претседателот на Европската централна банка (ЕЦБ) Жан-Клод Трише, рече дека би било „апсурдно“ за Грција да ја напушти еврозоната. „Грција е денес многу подобра држава ... во споредба со претходно“, рече Трише по состанокот со претставниците на ЕЦБ. Грчкиот премиер Јоргос Папандреу е во Луксембург, каде што в петок ќе се состане со Трише; тој, исто така, се очекува во Берлин, на разговори со германската канцеларка Ангела Меркел.

Грчките мерки на штедење и понатаму наидуваат на силен отпор дома. Синдикатот на приватниот сектор ГСЕЕ и синдикатот на јавниот сектор АДЕДИ ги повикаа членовите да се соберат пред парламентот во петокот против мерките на штедење. Протестот го погоди транспортот, училиштата и медиумите. (AФП, Фокус, Блумберг - 05/03/10; AФП, Ројтерс, Вол стрит џрнал - 04/03/10)