Четири коалиции ќе учествуваат на јунските општи избори во Албанија

17/05/2009

ТИРАНА, Албанија -- Вкупно 26 политички партии организирани во четири коалиции ќе учествуваат на албанските парламентарни избори на 28-ми јуни, објави во петокот (15-ти мај) Централната изборна комисија, по одобрувањето на кандидатските листи. Владејачката Демократска партија (ДП) ја води коалицијата „Сојуз за промени“ од десет партии. Другата десничарска коалиција е предводена од Христијанско-демократската партија на Албанија. Главната опозициска Социјалистичка партија има пет партнери, здружени во левичарска коалиција „Обединување за промени“. Социјалистичкото движење за интеграција (СМИ) е на чело на четвртата, левичарска коалиција, наречена „Социјалистички сојуз“.

Во другите вести од петокот, обвинителите во градот Берат подигнаа обвинение против поранешниот министер за труд и социјала, Коста Барка, за злоупотреба на функцијата, објави канцеларијата на генералниот обвинител. Барка е обвинет за злоупотреба на фондовите и донациите наменети за невладина организација која води училиште за деца, жртви на крвната одмазда во Поличан. Минатиот јануари истрага покажа дека децата во рехабилитациониот центар Поличан се потхранети и малтретирани. (Maкфакс, Фокус, Балкан инсајт, Ринаскита балканика - 15/05/09)