Новата партија ГЕРБ извојува тесна победа на првите избори во Бугарија за Европскиот парламент

21/05/2007

СОФИЈА, Бугарија -- Двете десничарски партии -- Сојузот на демократските сили и новоформираната партија на градоначалникот Бојко Борисов, Граѓаните за европски развој на Бугарија (ГЕРБ) -- извојуваа тесна победа на првите избори во Бугарија за Европскиот парламент (ЕП), објави во понеделникот (21-ви мај) Изборната комисија. ГЕРБ освои 21,69 отсто од гласовите, победувајќи ја коалицијата на владејачката Бугарска социјалистичка партија (БСП), Платформа еврoпски социјалисти, која освои 21,41 отсто и Движењето за правата и слободите (МРФ) на етничките Турци, помалиот владин партнер, со 20,26 отсто. Секоја од трите водечки партии би можела да добие пет места од 18-те за Бугарија во ЕП. Официјалната распределба на местата се очекува да биде објавена до среда.

Ултранационалистичката опозициска коалиција „Атак“ беше четврта со 14,22 отсто од гласовите, а потоа следеше вториот помал партнер во владата, НМС-II, со 6,26 отсто од гласовите, кои се очекува, исто така, да освојат места во ЕП. Ниту една друга партија, вклучувајќи ги и трите помали десничарски опозициски партии, не успеаја да го поминат изборниот праг -- што резултираше со оставка на водачот на Демократите за посилна Бугарија.

Одѕивот на изборите беше само 28,6 отсто, најниско регистрирано ниво од 1990-та година. Аналитичарите велат дека гласачите можеби ја казнуваат БСП за актуелниот корупциски скандал со високи владини и разузнавачки функционери. (Сега, бТВ, Дарик, Дневник, Ројтерс, АП, УПИ, БНР - 21/05/07)