Бројот на Србите во северно Косово е спорен

20/08/2012

Косовските агенции и Белград спорат околу бројот на Србите што живеат во северно Косово.

Линда Карадаку за Southeast European Times во Приштина -- 20.08.12

Бројот на Србите што живеат во северно Косово не е сигурен. [Ројтерс]

Додека се чека објавувањето на резултатите од минатогодишниот попис следниот месец, конфузијата околу тоа колку Срби живеат во северно Косово се интензивира. Прашањето е усложнето со фактот дека Србите од северот одбија да учествуваат на пописот на населението минатата година.

Резултатите ќе ги вклучат бројките од 34 косовски општини, но нема да опфатат три општини на северот. Тој број ќе се заснова на прелиминарниот тест на пописот кој беше спроведен на северот во периодот 2008-2009 година.

Тој број на населението, кој изнесува околу 40.000, ќе биде додаден на финалните бројки од пописот, изјави Сабри Заберѓа, директор на Канцеларијата за попис, за косовскиот весник Зери.

Заберѓа рече дека резултатите се очекува да бидат прифатени од Канцеларијата на ОН за проектни услуги, која спроведува градење на мирот, хуманитарни и развојни операции.

Но, не се сите согласни со тоа.

„Не можам да потврдам ништо за тоа. Сé уште не е донесена одлука. Ќе ги дадеме финалните резултати за 34 општини, но немаше попис во три општини на северот“, изјави за SETimes Иса Красниќи, шеф на косовската Агенција за статистика.

Красниќи рече дека неговата агенција има други податоци за населението за северот, кои треба, исто така, да се потврдат. „Косово ќе има статистички податоци за генералниот број на население. Ќе дадеме генерални податоци за цело Косово, вклучително и за северот. Податоците ќе бидат канализирани, но важно е истите да се признаени од Еуростат“, додаде Красниќи.

Косово имаше пробни пописи во 2005, во 2006 и во 2008 година. Повеќе од 71 отсто од Србите во северно Косово учествуваа на тестот во 2008 година, но одбија да учествуваат на самиот попис во 2011 година.

Претпријатието „СтатГИС шкп“ го доби договорот со косовската Агенција за статистика, за ажурирање на податоците на Статистиката по области (СО) во земјата.

„Ажурирањето на податоците на СО беше дел од подготвителните активности за пописот. Алатките и методите што се користеа во овој процес беа одобрени од локалните и меѓународните учесници вклучени во подготвителните активности за пописот“, рече за SETimes Нехат Дервиши, директор на претпријатието.

Рамадан Иљази, коосновач на движењето Фон (Крени го гласот), вели дека бројот на населението на северот не може да се знае со сигурност.

„Треба да сме свесни дека прашањето за Србите што живеат во Косово претставува проблем на векот меѓу Албанците и Србите. Секогаш кога владите на соодветните држави говорат за ова прашање, тоа ја губи практичната и хуманата димензија“, рече Иљази за SETimes.

Но, Белград објави дека има околу 52.000 до 55.000 граѓани на северот на Косово, според податоците од 2009 година. Од тоа, 95 отсто се Срби, а 5 отсто се Албанци, Бошњаци, Горани и Роми. Најголема општина е Северна Митровица, која има повеќе од 20.000 граѓани. Најмала е Зубин Поток, со околу 4.000 жители.

Славица Марковиќ, 52-годишен трговец во Северна Митровица, вели дека нема точни податоци за тоа колку Срби и Албанци живеат на северот. „Луѓето велат дека има од 40.000 до 50.000 Срби. Не знам колку Албанци живеат на северот. Ќе се регистрирам кога српските институции ќе одржат попис“, рече Марковиќ за SETimes.

Пописот од 2011 година во Косово беше прв по 1981 година.

Дописничката на SETimes Ивана Јовановиќ во Белград даде свој придонес за овој напис.

Гласаj

 

 

• Испратете на пријател по електронска пошта
• печатена верзија
• 

Пораката е испратена.

Ве молиме, напишете име.

Ве молиме, напишете ја Вашата адреса за електронска пошта.

Имејл адресата што ја внесовте не е точна.

Ве молиме, напишете коментар.

* СИТЕ ПОЛИЊА СЕ ЗАДОЛЖИТЕЛНИ

Адресата на електронската пошта на пријателот *

Вашето име или адреса за електронска пошта *

коментар *

Бројките не одговараат. Ве молиме внесете повторно.

внесете бројки *