Косово мирно на денот на изборите во Србија

07/05/2012

Со менаџмент на ОБСЕ, во Косово беа организирани српски претседателски и парламентарни избори.

Мухамет Брајшори за Southeast European Times во Приштина -- 07.05.12

Косовските Срби гласаа на претседателските и парламентарните избори во неделата (6-ти мај) во Косово. [Ројтерс]

Севкупната ситуација во неделата (6-ти мај) -- кога косовските Срби излегоа на гласање на претседателските и општите избори -- беше мирна, иако косовската полиција, ЕУЛЕКС и КФОР го зголемија своето присуство на северот и во некои други области во Косово, вклучително и во Приштина.

Приштина во неделата издаде соопштение, веднаш по затворање на избирачките места, во кое се вели дека изборите се одржале со почитување на правата на граѓаните со двојно државјанство.

Но, владата ги критикуваше локалните власти во градовите Звечан и Зубин Поток, кои, и покрај противењето на меѓународната заедница и Приштина, организираа локални избори.

„Владата нагласува дека српските општински власти во двете општини во Косово се нелегални и дека немаат правен ефект и политички или демократски легитимитет“, соопшти владата.

„ОБСЕ и косовската полиција успеаја да организираат избори за многу кус период и ние сме среќни што не се регистрирани никакви инциденти. Ова беше за првпат ексклузивното право на Косово да ги примени парламентарните процедури на територијатија на Косово, да биде гарантирано од целата меѓународна заедница, од ЕУ и САД до ОБСЕ и ОН“, рече за SETimes косовскиот заменик-министер за надворешни работи, Петрит Селими.

Тој вели дека локалните избори нема да бидат признаени и дека нема да имаат правен ефект за Приштина и за меѓународната заедница. Но, новата влада во Белград го има последниот збор.

„Ова се јалови обиди на екстремистите кои знаат дека следните чекори во Косово повлекуваат затворање на паралелните институции -- што е од најголема важност за барањето од ЕУ кон новата српска влада. Паралелните локални избори не се настан за кој треба да се размислува“, рече Селими.

Жерард Галучи, поранешен администратор на ОН за Митровица и претседател на одборот на Трансконфликт, изјави за SETimes дека посветеноста на КФОР и ОБСЕ покажа колку улогата на меѓународните мисии може да помогне во Косово.

„Со активен ангажман на КФОР и ОБСЕ -- двете во Косово под мандатот на ОН -- луѓето беа во можност да ги искористат своите политички права без тешкотии или провокации. Ова покажува дека мировните сили сé уште имаат улога што треба да ја остваруваат“, рече Галучи.

Единствените инициденти што се случија беа неодамнешните апсења -- во јужна Србија (Прешевската долина) на осум Албанци, и во саботата на еден Косовар кој патувал со своето семејство низ Србија -- од страна на српската полиција.

Апсењата и повиците од Приштина и Тирана да се излезе на гласање, доведоа до околу 70 отсто излезност на Албанците во јужна Србија -- најголем одѕив за овие општини.

„Следната фаза од контактите меѓу Белград и Приштина ќе мора да се фокусира на олеснувањето на животот на луѓето во Прешевската долина. Но, пред сé, провокациите и произволните апсења таму мора да запрат“, рече Селими.

Галучи рече дека апсењата имаа врска со изборите, а не со владеењето на правото.

„Се сомневам дека тајмингот на апсењата во Прешево беше поврзан со српските избори, а не со изненадниот интерес за „редот и законот“. Но, вредно е да се спомене дека албанската заедница не одговори на провокацијата“, рече тој.

„Среќен сум што сé помина добро. Уморни сме од проблеми; ни треба подобра иднина за нашите деца“, рече за SETimes Сузана Дехари, наставничка од Приштина.

Но, Фатон Красниќи, студент по право, рече дека Приштина не го направи тоа што рече дека ќе го направи и не ги запре изборите.

„Тие рекоа дека локални избори никогаш нема да се дозволат, но тие беа организирани. Толку сериозно владата си ја врши работата -- само дава изјави“, рече тој за SETimes.

Изборите се одржаа во 90 избирачки места на 28 локации.

Иако резултатите од Косово сé уште не се објавени, судејќи според резултатите на гласањето во Србија, овие гласови може да се оние што ќе ја направат разликата и ќе одлучат за влезот на одредени партии во парламентот.

Поврзани написи

Прелиминарните резултати покажаа дека Српската радикална партија на Воислав Шешељ е под изборниот праг од 5 отсто, но гласовите од Косово може да го променат тоа.

Државниот секретар во Министерството за Косово, Оливер Ивановиќ, го пофали фактот дека изборите поминаа без инциденти, но изјави за SETimes дека недостатокот на избирачки места претставува проблем.

„Малиот број избирачки места го оневозможи гласањето на повеќе Срби. Околу две третини од избирачките места беа елиминирани, бидејќи ОБСЕ немаше доволно персонал да ги покрие сите избирачки места кои се вообичаено отворени“, рече Ивановиќ.

Дописничката на SETimes Бојана Миловановиќ во Белград даде свој придонес за овој напис.

Оваа содржина е овластена за SETimes.com.