Балканските земји ќе учествуваат во обуката предводена од НАТО во Авганистан

20/10/2011

Мисијата ќе учествува во Авганистанската школа за воена полиција во Кабул, каде што обучувачи од балканските земји ќе им помагаат на офицерите да се стекнат со специјализирани вештини.

Цветина Борисова за Southeast European Times -- 20.10.11

Балкански офицери ќе учествуваат во обуката предводена од НАТО во Кабул. [Ројтерс]

Министрите за одбрана од Албанија, Македонија, Црна Гора и Босна и Херцеговина (БиХ) им се приклучија на Хрватска и Словенија во обврската да обезбедат конкретна поддршка за обуката на мисијата предводена од НАТО во Авганистан, ИСАФ.

Договорот, кој дојде во вид на меморандум за разбирање меѓу земјите од Јадранската повелба, беше постигнат на состанокот во седиштето на НАТО во Брисел, на 6-ти октомври. БиХ беше, исто така, претставена на настанот и вети дека ќе го додаде својот потпис на документот откако ќе успее да формира влада на државно ниво.

Мисијата ќе учествува во Авганистанската школа за воена полиција во Кабул, каде што обучувачите од балканските држави ќе им помагаат на офицерите да развијат специјализирани вештини. Истата првично ќе вклучува 40 членови, иако нивниот број може да се зголеми во иднина.

„Ангажманот од ваков вид јасно ја покажува нашата целосна поддршка за новата здружена стратегија во Авганистан преку овозможување на клучните способности и експертиза за успешно спроведување на Транзицискиот процес“, рече на церемонијата хрватскиот министер за одбрана, Давор Божиновиќ, чија земја е менторска во школата за воена полиција во Кабул.

„Оваа соработка меѓу Хрватска, БиХ, Словенија, Македонија и Црна Гора со поддршка на нашиот американски партнер испраќа порака дека државите што неодамна беа предмет на меѓународни мировни операции денес можат да работат заедно во конфликтните области во светот, и ова е порака до Авганистанците дека инвестирањето во мирот и безбедноста се исплати“, додаде тој.

Аналитичарите коментираа дека заедничката иницијатива е доказ за подготвеноста на поранешните југословенски републики да покажат дека му го свртеле грбот на минатото и гледаат кон заедничката евроатланска иднина.

„Мислам дека ова претставува позитивен чекор во однос на соработката на поранешните југословенски републики, и во исто време ја потпомага интеграцијата во пошироките евроатлански структури“, рече за SETimes аналитичарот Јоанис Михалетос, кој ја координира Канцеларијата за Југоисточна Европа, на Светската мрежа за безбедност.

„Сите овие држави сакаат да й докажат на меѓународната заедница дека се способни да соработуваат меѓу себе и, на некој начин, да се ослободат од лошите аспекти на минатото“, додаде тој.

Според воениот аналитичар Атанасиос Другос, минатите искуства на овие земји ќе бидат од голема помош за обуката во Авганистан.

„Сите гореспоменати земји се запознаени со одредени воени операции и операции на повторно градење, во текот на изминатата деценија; ... несомнено нивните искуства ќе бидат клучни за успехот во Авганистан“, рече тој за SETimes.

Србија не се приклучи на иницијативата, иако учесниците рекоа дека вратите се отворени. Според Михалетос, „Србија е посебен случај, бидејќи не е во НАТО и се чини дека ќе остане така во блиска иднина“.

„Сепак, постои веројатност Србија на крајот да испрати тим во Авганистан како мировни сили, но јас мислам дека не во соработка со другите земји, туку самостојно и со билатерален договор или со НАТО во целина или посебно со САД“, додаде тој.

Поврзани написи

Другос смета дека Белград може да даде голем придонес во здружените напори. „Со текот на годините тие добиваа сé поголемо искуство со НАТО/КФОР работејќи заедно со сите сојузнички трупи во Косово“, рече тој за SETimes.

Придонесот на Југоисточна Европа во ИСАФ беше, исто така, дискутиран на конференцијата во Загреб од 12-ти до 14-ти октомври, на која домаќин беше Маршаловиот центар, здружението МЦ Алумни од Република Хрватска и фондацијата Конрад Аденауер Штифтунг.

Настанот, на кој учествуваа 130 учесници од Албанија, БиХ, Бугарија, Хрватска, Македонија, Црна Гора, Романија, Србија и Авганистан, имаше за цел да обезбеди увид во актуелната ситуација во Авганистан и да ги анализира придонесите на балканските држави за неговата стабилизација, реконструкција и развој.

„Консензусот е дека земјите од ЈИЕ ќе продолжат да ја поддржуваат ИСАФ како „благородна и чиста“ мировна мисија и по 2014 година“, рече за SETimes организаторот на конференцијата, потполковник Арне Лосман, шеф на Извршниот тим Југоисточна Европа во Директоратот на нерезидентните програми, на Маршаловиот центар.

Оваа содржина е овластена за SETimes.com.