Ширењето на вахабизмот предизвикува загриженост во БиХ

29/07/2010

Ширењето на радикалниот вахабистички ислам меѓу некои Бошњаци и понатаму е причина за загриженост.

Од Јусуф Рамадановиќ за Southeast European Times во Сараево -- 29/07/10

Вахабистите ја нападнаа полициската станица во Бугојно минатиот месец. [Getty Images]

Терористичкиот напад на полициска станица во централниот босански град Бугојно на крајот од минатиот месец -- при кој загина полицаецот Тарик Љубушкиќ, а шестмина други беа ранети -- ја покажува тензијата што ја предизвикува малата, но сé поагресивна, вахабистичка заедница.

Тековната истрага откри дека осомничениот за бомбашкиот напад Харис Чаушевиќ и организаторот Насер Палисламовиќ имаат долготрајни врски со радикалната исламистичка секта, како и тројцата други осомничени кои беа уапсени.

Терористичката ќелија, наводно, извршила напад бидејќи се противи на популарниот муслимански собир во Ајватовица за оддавање почит на верско лице од минатото.

„Мислам дека главната цел на вахабистичкото движење е да се создаде верска држава прифатлива само за муслиманите -- без Србите и Хрватите“, изјави премиерот на БиХ Никола Шпириќ за локалните медиуми овој месец.

Властите на Република Српска (РС) предупредија за слични терористички напади од радикалните исламисти, кои добиваат финансиски средства од Саудиска Арабија и Иран. Властите, исто така, предупредија дека акциите на групата може да имаат негативни последици за европската интеграција на БиХ, вклучително и визната либерализација.

Во меѓувреме, босанските медиуми долеваат масло на огнот отворено критикувајќи ја исламската заедница во земјата и нејзиниот голем муфтија Мустафа Ефенди Чериќ, за тоа што не се дистанцираа доволно од Вахабистите.

Исламската заедница ги отфрла обвинувањата, повикувајќи ја владата да преземе решителни мерки низ цела БиХ. Целта на Вахабистите е „да предизвика недоверба, страв и загриженост, да не одвлече од ... [евроатланските] интеграции“, вели заедницата.

И покрај уверувањата, еден Бошњак кој говороеше за SETimes рече дека луѓето се исплашени. „Економските проблеми се усложнети со омразата и агресивната вахабистичка пропаганда“, рече тој, жалејќи поради успехот во привлекувањето незадоволни млади Бошаци.

„По правило, тие потекнуваат од сиромашни семејства со внатрешни проблеми и конфликти и се психички нестабилни луѓе. Таков е случајот со [осомничениот бомбаш Чаушевиќ].“

Други веруваат дека етничката поделеност на земјата им дава можност на вахабистите.

Маријана Грабовац (56) го опиша Бугојно како „поделен град“ во кој католиците и Бошњаците одат во различни кафулиња. „Поделеноста е распространета и на работните места и во секојдневниот живот и комуникацијата“, изјави таа за SETimes.

„Ако не се направи нешто итно на државно ниво, дури и ова малку соживот што остана меѓу католиците и муслиманите ќе се уништи“, рече жителот на Бугојно Иван Будимир.

Владата се чини дека ја сфати сериозно загриженоста. Министерот за безбедност, Садик Ахметовиќ, вети решително дејствување, велејќи дека нападот алармирал за „ставање на целото вахабистичко движење под контрола“.