Aмерикански извештај: Балканот е сé уште главен транзитен правец

03/03/2010

Поради својата стратешка позиција помеѓу центрите за производство на наркотици во Југозападна Азиja и потрошувачите во Западна Европа, Балканот останува клучен правец за трговијата со дрога, заклучува американскиот Стејт департмент во новиот извештај.

(Софиска новинска агенција, Радио Србија - 02/03/10; американски Стејт департмент, МИА - 01/03/10)

Според извештајот, Романија, Србија и Турција се главните транзитни држави за наркотици. [Архива]

Балканот и понатаму е главниот пат низ кој минува нелегалната дрога од центрите на производство и преработка во Југозападна Азија до пазарите во Западна Европа, објави американскиот Стејт департмент во својот 27-ми годишен меѓународен Извештај за стратегијата на контрола на наркотиците, објавен во понеделникот (1-ви март).

Првиот дел од студијата од 600 страници дава преглед на напорите на 130-те држави и судства во 2009 година за справување со домашните проблеми со наркотиците и исполнување на меѓународните обврски.

Вториот дел од извештајот ги истакнува најзначајните чекори преземени од 60-те држави -- категоризирани како „главни држави за перење пари“ -- минатата година за подобрување на нивните режими против перењето пари и против терористичките финансирања. Кипар, Грција и Турција се меѓу државите кои се најдоа на листата.

Извештајот ги опишува Романија, Србија и Турција како главни транзитни држави, долж историската Балканска рута за дрогата од државите кои произведуваат наркотици на исток до корисниците во Европа.

Романија се наоѓа по должината на Севернобалканската рута за опиум, морфиумска база и хероин кои се пренесуваат од Авганистан за Европа. Скоро 60 отсто од дрогата што влегува во државата се верува дека е наменета за Западна Европа.

„Се верува дека хероинот, екстази и другите дроги се складирани во големи количини во Романија и чекаат понатамошен транспорт“, се вели во извештајот. Државата, исто така, претставува транзитна точка за пренесување на синтетичките дроги и хемикалии-прекурсори кон Турција и понатаму до Авганистан. Според некои индикации, Романија е можно да заземе зголемена улога како транзитна точка за кокаинот од Јужна Америка за Западна Европа, според овој извештај.

И покрај предизвиците со кои се соочува државата како резултат на светската финансиска и економска криза, „романските власти и понатаму тесно соработуваат со американските и регионалните колеги за успешни и ефикасни меѓународни операции на запленување“, се вели во документот.

Што се однесува до Романија, само мала количина дрога што се шверцува во Србија останува во државата за домашна потрошувачка. Додека хероинот се опишува како доминантен наркотик кој се пренесува од Централна Азија по должината на Балканската рута, српските групи на организиран криминал се вели дека сé повеќе шверцуваат кокаин од Јужна Америка директно за Западна Европа.

Покрај тоа што е главна транзитна точка на патот на наркотиците од Југозападна Азија за Европа, Турција „служи и како појдовна точка за големите шверцери на дрога и дилери на дрога“, се вели во извештајот. Во него се истакнува и дека „некои преработки на опиумот и морфиумската база од Авганистан се случуваат во близина на турско-иранската граница“, како и дека многу од големите шверцери со база во Турција се етнички Турци или Иранци.

„Големите организации за шверц со дрога и главните шверцери со седиште во Турција, честопати се вклучени во производството и транспортот на хероин“, велат авторите. „Неколку се, исто така, вклучени во производството и/или шверцот на синтетички дроги.“

Грција, која исто така лежи на традиционалната Балканска рута, беше наречена држава „порта“ во транзитот на нелегални наркотици и шверцот. Авторите на извештајот истакнуваат дека Грција географски претставува омилена транзитна држава на патот за Западна Европа.

Од другите држави на тој правец, Албанија, Босна и Херцеговина, Бугарија, Хрватска, Косово и Црна Гора се опишуваат како транзитни точки, додека Македонија се опишува како држава „која не е ниту голем производител, ниту е главна регионална транзитна точка за нелегалната дрога“.

Покрај тоа што е транзитна држава, Бугарија е и производител на нелегална дрога, особено амфетамински стимуланси, се вели во извештајот, а Албанија се наведува како производител на канабис наменет за пазарите во Европа.