„Способноста да допре до обичниот човек“ клучна одлика на грчкиот претседател

04/02/2010

Како единствен кандидат, грчкиот претседател Каролос Папуљас освои уште еден петгодишен мандат. Но, неговата победа падна во сенката на континуираната финансиска криза во земјата.

Од ХК Цанис за Southeast European Times во Атина -- 04/02/10

Грчкиот парламент гласаше да му се даде уште еден петгодишен мандат на претседателот Папуљас во средата (3-ти февруари). [Getty Images]

Грчкиот претседател Каролос Папуљас беше лесно реизбран за претежно церемонијалната „највисока функција“ во државата, во средата (3-ти февруари), со големо мнозинство во парламентот. Пријатниот 80-годишник ќе положи свечена заклетва на 12-ти март.

Изборот помина во сенката на неделата во која владата ги обелодени конкретните мерки за решавање на двоцифрениот буџетски дефицит и огромниот јавен долг.

Папуљас доби втор, петгодишен мандат. Уставот предвидува ограничување од два мандати за претседател, позиција која е замислена да се издигне над партиската политика. Претседателот не може да блокира закон предложен од страна на владата и ратификуван од страна на парламентот, туку само бара „консултација“ со владејачката партија пред предлог-законот или декретот да стане закон.

Вкупно 266 делегати од владејачката, социјалистичка партија ПАСОК, заедно со конзервативната главна опозициска и помала десноцентристичка партија, го поддржаа изборот на Папуљас. Занемарливи 32 пратеници од двете партии на левицата и екстремната левица, се изјаснија само како „присутни“, но не гласаа против. Двајца пратеници беа отсутни.

Папуљас, министер за надворешни работи во претходните влади на ПАСОК до 1996 година, е роден во приезерскиот град Јанина, во северозападната провинција Епирус.

Ветеранот-новинар од Јанина, Јоргос Кирузис, за Southeast European Times во четвртокот изјави дека за време на мандатот на Папуљас како министер за надворешни работи, тој летал директно дома во Јанина по важните работи надвор од земјата за да ги информира локалните новинари. Невообичаената практика била начин да се покаже важноста на провинциските медиуми.

„Тој е многу во допир со обичниот народ; секојпат кога ќе го посети езерото застанува да разговара со рибарите, од кои многумина ги знае уште од детството“, додаде Кирузис.

Новинарот вели дека луѓето во Јанина и Епирус веруваат дека Папуљас ја издигна функцијата претседател „подигнувајќи ги стандардите уште повисоко ... преку неговото севкупно остварување во претставувањето на државата во странство“.