Во Србија на сила влегоа построги сообраќајни прописи

21/12/2009

Минатата година скоро 900 лица загинаа во сообраќајни несреќи, што доведе до воведување нови безбедносни процедури.

Од Бојана Миловановиќ за Southeast European Times во Белград – 21/12/09

Србија воведе нов закон за сообраќајот. [Никола Барбутов/SETimes]

Новиот закон за безбедност во сообраќајот предвидува построги правила за возачите и пешаците, кои стапија на сила на 10-ти декември во Србија.

Според законот, за сообраќајни прекршоци ќе се добиваат казнени поени. На возачот кој ќе добие 18 казнени поени, ќе му биде одземена возачката дозвола.

Патиштата ќе бидат следени со помош на новата опрема за видео-набљудување, а користењето мобилни телефони за време на возењето, е забрането. Забраната за мобилни телефони, исто така, важи и за пешачите кои преминуваат улица.

Ограничувањето за алкохол во крвта е намалено од 0,5 отсто на 0,3 отсто, а нивото од 2 отсто и повисоко ќе резултира со апсење и можна затворска казна.

Ограничувањето на брзината е, исто така, намалено, од 60 на 50 километри на час, а закон за задолжително носење шлем е воведен за велосипедистите и мотоциклистите.

Возачите помлади од 18 години ќе добиваат дозвола за кандидати за возачи, која бара да имаат патник со најмалку пет години возачко искуство во автомобилот со нив во секој момент. Возачите кои имаат вакви дозволи не смеат да бидат на патиштата меѓу 11 часот навечер и 5 часот наутро.

Според полициските извештаи, 756 лица загинале во сообраќајни несреќи во првите 11 месеци од оваа година. Најчесто случаите се предизвикани од прекумерна брзина, возење под дејство и возење на црвено светло. Минатата година бројот на лицата кои загинале во патни несреќи изнесуваше 897.

„Самиот закон нема да го намали бројот на несреќи и жртви, но неговото спроведување ќе го намали. Тоа спроведување не смее да биде селективно, туку мора да се однесува на секој член од законот“, рече претседателот на Комисијата за безбедност во сообраќајот Дамир Окановиќ за SETimes.

„Построгите казни се важни, но обуката за возачите е уште поважна, за да можат да ја разберат важноста на следните сообраќајни правила. На пример, зошто брзината на движење во населените места е 50 километри на час и колку е тоа важно за нивната безбедност“, додаде тој.

Српскиот министер за внатрешни работи, Ивица Дачиќ, ги предупреди своите пријатели и семејство да не му се јавуваат ако направат сообраќаен прекршок, бидејќи нема да добијат специјални привилегии.

Возачите имаат околу три недели грејс период да се приспособат на новите регулативи. Полицијата ќе издава предупредувања и ќе ги информира возачите за новите одредби до 1-ви јануари, по што прекршителите ќе бидат казнувани.

Полицијата нема да може да наплаќа казни на лице место, туку ќе издава наредби за плаќање. Казните ќе се движат од околу 30 до 500 евра и ќе бидат двојно зголемени ако е присутно дете помало од 12 години.

Според проценките на Светската банка, Србија троши околу 2,3 отсто од својот БДП на патните несреќи. Новиот закон е моделиран по примерот на германскиот, кој ги намали нејзините сообраќајни несреќи и прекршоци на половина.