Српскиот парламент го ратификуваше статутот на Војводина

01/12/2009

И покрај противењето, парламентот го ратификуваше статутот на северната српска покраина Војводина.

Од Игор Јовановиќ за Southeast European Times во Белград -- 01/12/09

Војводина. [Архива]

Повеќе од една година по усвојувањето од страна на владата, парламентот го усвои статутот на Војводина во понеделникот (30-ти ноември). Одложувањето на ратификацијата беше резултат на противењата како од членовите на владејачката коалиција, така и од опозицијата, кои сметаат дека статутот го крши уставот и ѝ дава премногу власт на северната српска покраина.

Од вкупно 163 членови на парламентот кои беа присутни за време на гласањето, 138 гласаа за законот, според српската државна новинска агенција Танјуг.

Главните приговори на опозицијата се однесуваа на тоа што статутот го прогласува најголемиот град во Војводина -- Нови Сад за главен град, и што ѝ се дозволува на покраината да отвори канцеларии со свои претставници во странство, да склучува договори со други земји и да формира сопствена Академија на науките и уметностите.

По усвојувањето на амандманите на социјалистите минатиот месец, Војводина се дефинира со статутот како автономна покраина и неодвоив дел од Србија. Измените, исто така, предвидуваат дека Војводина може да отвора претставнички канцеларии во европските региони и во Брисел, со согласност на српската влада, и Нови Сад повеќе не се дефинира како главен град, туку како главен административен центар.

И покрај измените, опозицијата е и понатаму незадоволна. Поранешниот премиер Воислав Коштуница од Демократската партија на Србија вели дека фактот што статутот ќе содржи одредба за референдум во врска со територијата на Војводина е опасен за интегритетот на Србија. Партијата планира да побара мислење на Уставниот суд во врска со ова прашање.

Другите власти ја отфрлија ваквата загриженост.

Претседателот на собранието на Војводина Сандор Егереси вели дека владејачката коалиција покажала политичка зрелост со усвојувањето на статутот, додавајќи дека тоа е само почеток на децентрализацијата и регионализацијата на Србија.

Шефот на Војводинската администрација и заменик-претседател на Демократската партија Бојан Пајтиќ ги отфрли обвинувањата дека новиот статут е сепаратистички. „Војводина сега ќе има поголема власт, но сепак помала од другите региони во Европа“, рече Пајтиќ за време на дебатата.

Водачот на Социјалистичката партија и српски вицепремиер Ивица Дачиќ рече дека амандманите на статутот „се најголем пораз за заговорниците на автономијата по две децении“, бидејќи „нивниот концепт за Војводина како република“ пропадна. Тој додаде дека Србија никогаш нема да ѝ дозволи на Војводина да излезе од нејзината територија.