Во Букурешт се одржа самит на Централноевропската иницијатива

17/11/2009

Форумот на ЦЕИ беше значаен ангажман за Романија, на кој учесниците усвоија серија важни документи.

Од Пол Чикои за Southeast European Times во Букурешт -- 17/11/09

Самитот во Букурешт ја одбележа 20-годишнината од основањето на ЦЕИ и падот на комунизмот. [Габриел Петреску/SETimes]

Романија, актуелен претседавач на Централноевропската иницијатива (ЦЕИ) 2009, беше домаќин на годишниот состанок на групата во четвртокот (12-ти ноември) и петокот. Меѓу присутните имаше претставници на меѓународните финансиски институции, шефови на држави и министри за надворешни работи од 18 држави на ЦЕИ.

Самитот во Букурешт ја одбележа 20-годишнината од основањето на ЦЕИ и падот на комунизмот. Министерскиот состанок беше насловен како „Поддршка на заедничката европска иднина, соочување со актуелните предизвици“.

Учесниците, меѓу кои и новиот молдавски премиер Влад Филат, разговараа за политичките и економските актуелности и напредокот во евроатланското членство.

„Европската перспектива останува исклучително важен инструмент за напредокот на реформите. Покрај ова, напорите кон постигнување на оваа цел претставуваат значаен чекор за регионалната стабилност. Но, освен одговорот на напредокот на владите од Западен Балкан, ЕУ мора да испрати и порака на доверба до граѓаните во регионот“, рече романскиот претседател на техничката влада, Емил Боц.

Генералниот секретар на ЦЕИ, Пјетро Ерколе Аго, го истакна значителниот придонес на организацијата во поддршката и консолидирањето на политичкиот дијалог и доделувањето помош на земјите кои не се членки на ЕУ, на нивниот пат кон интеграцијата.

„Членките на ЦЕИ добиваат не само политичка помош, туку и конкретна помош, преку промовирање на некои проекти на соработка, помеѓу членките на ЕУ и земјите што не се членки на ЕУ“, рече Аго.

На самитот, исто така, беа финализирани некои важни документи -- Годишниот извештај, Финалниот документ, Акциониот план за 2010-2012 година и годишниот извештај на генералниот секретар.

Членки на ЦЕИ се: Албанија, Австрија, Босна и Херцеговина, Бугарија, Чешка, Хрватска, Италија, Македонија, Молдавија, Црна Гора, Полска, Романија, Словачка, Словенија, Србија, Украина и Унгарија.

ЦЕИ соработува со меѓународни организации и институции, како што се: Организацијата за економска соработка и развој, Советот на Европа, ОБСЕ, Европската банка за реконструкција и развој и Светската банка, и различни регионални структури, како што се: Јадранско-јонската иницијатива, Дунавскиот процес на соработка и Пактот на стабилност.

За време на своето претседавање, Романија се фокусираше на Европската статегија во областа на Дунав, заеднички проект со Австрија. Претходно оваа година, во документ за Европската комисија, Романија детално ја разработи комунитаристичката стратегија за регионот на Дунав до 2010 година, со цел обезбедување подобра консолидација на економската и социјалната кохезија на крајбрежните држави.

Црна Гора ќе го преземе претседавањето во јануари.