Невладини организации го обвинија Башеску за предизборна измама

09/11/2009

Четири невладини организации велат дека претседателот неправично го користи референдумот за зголемување на своите шанси за реизбор.

Од Пол Чикои за Southeast European Times во Букурешт -- 09/11/09

Романскиот претседател Трајан Башеску [Getty Images]

Група од четири невладини организации -- Транспарентност Романија, Асоцијација про демократиа, Центар за судски ресурси и Агенцијата за мониторинг на медиуми -- на 29-ти октомври побараа од романскиот народен правобранител да поднесе жалба до највисокиот суд во земјата, барајќи да ги одвои претседателските избори од референдумот за еднодомен парламент, двата закажани за 22-ри ноември.

Четирите организации тврдат дека претседателот Трајан Башеску, кој има уставно право да распише референдум, ќе се појави на изборните постери за референдумот и за претседателските избори -- со што всушност се става на нерамноправна основа со другите кандидати.

„Го повикуваме народниот правобранител, кој ја има оваа можност, да го информира уставниот суд во врска со фактот дека претседателот, истовремено и кандидат, може да предложи референдум и може, исто така, да се кандидира за втор мандат истиот ден“, рече Кристијан Парвулеску, претседател на Про демократија.

„Ова се чини дека обезбедува дополнителни шанси за претседателот. Тоа е предност и ние се прашуваме дали на овие избори се почитува еднаквоста, меѓу конкурентите“, додаде тој

„Се работи за измама; јас би ја нарекол морална. Веруваме дека ова претставува манипулација и искривување на изборниот говор“, рече Георгијана Јоргулеску, претседателка на Центарот за судски ресурси.

„Кампањата за референдумот веќе започна. Судејќи според насилството преку кое тој [Башеску] го промовира проблемот во врска со бројот на пратеници и еднодомниот парламент, ние можеме да кажеме дека сме сведоци на предизборна измама“, рече Мирчеа Тома, шеф на агенцијата Медиа мониторинг.

Освен изборните постери кои се користат во кампањата на Башеску за претседателските избори, илјадници други, на кои се наоѓа ликот на претседателот, се појавија низ целата земја за промовирање на еднодомен парламент. Некои се жалат дека пораките на овие постери се тешки, со слоганите како „Нема да се извлечат од она од што највеќе се плашат“.

Башеску се залага за еднодомен парламент, со 300 пратеници, за разлика од сегашните 471 во двата дома.

Портпаролот на неговата кампања, заменик-претседателот на демократските либерали Север Воинеску, ги отфрли дејствата на невладините организации како „директно политички и изборни“ и рече дека четири организации со ова ја изгубиле својата политичка неутралност. Тој понатаму ги обвини дека отворено му служат на еден од конкурентите на Башеску во претседателската трка.

Организациите, исто така, се запрашаа за причината за зголемениот број избирачки места и постојаниот пад на интересот на населението за изборите. Според невладините организации, во 1990 година имало 12.000 избирачки места, потоа 15.000 во 2004 и 21.000 оваа година.

На изборите за Европскиот парламент во јуни, последни избори организирани во Романија, одѕивот изнесуваше само 27 отсто.