Јоханис избран за нов романски премиер

14/10/2009

Ова беше првата малцинска влада во последниве 20 години соборена по гласање за доверба во парламентот.

Од Пол Чикои за Southeast European Times во Букурешт – 14/10/09

Романскиот премиер Емил Боц (во средината), министерката за туризам, Елена Удреа (во средината лево), и министерот за економија Адријан Видеану (десно) присуствуаа на гласањето во парламентот во вторникот (13-ти октомври). [Getty Images]

Социјалдемократската партија (ПСД), Националлибералната партија (ПНЛ) и Демократскиот сојуз на Унгарците (УДМР), сите моментно во опозиција, се согласија во вторникот (13-ти октомври) да го назначат Клаус Јоханис, градоначалник на Сибиу и водач на Германскиот демократски форум, за премиер.

Трите партии, кои ја сменаа актуелната влада со гласањето за недоверба претходно истиот ден, официјално ќе го информираат претседателот Трајан Башеску за својата одлука.

ПСД, ПНЛ и УДМР, исто така, се согласија следната влада да биде формирана исклучиво од технократи, како и поголем дел од нејзиното внимание да биде насочен на министерството за надворешни работи и министерството за правда.

Извори на Медиафакс велат дека водачите на трите партии одлучиле да не потпишуваат договор за формирање коалиција за поддршка на новата влада, што значи дека ова ќе се смета за привремено решение, кое најверојатно ќе води до предвремени општи избори, откако ќе завршат претседателските избори на 22-ри ноември.

Сепак, според уставот, Башеску има право да ја игнорира номинацијата, и покрај фактот што трите партии имаат доволно места во парламентот за да ја изгласаат владата.

Некои шпекулираат дека Башеску ќе го номинира премиерот Емил Боц.

Вкупно 254 пратеници гласаа за иницијативата за недоверба, додека 174 гласаа против. Ова е прва влада од 1990-та година соборена со иницијатива поднесена од опозиција.

„Ја изгубивме битката, но не и целата војна. Владата падна бидејќи пратениците не сакаа да ги изгубат своите пензии и привилегии“, рече Боц, мислејќи на неодамнешниот проект за намалување на преференцијалните пензии и плати заради намалување на јавните трошоци.

„Со сите овие политички расправии, Романија во суштина губи два месеца од борбата против рецесијата. Технократската влада, составена за 45 дена, ја продолжува неизвесноста и ќе ги одвлекува странските инвеститори, додека оние што се присутни на внатрешниот пазар ќе бидат повнимателни“, изјави за SETimes Силвиу Сергиу, политички уреденик на локалниот весник Eвениментул зилеи.

„На политичко ниво, оваа криза му нанесува тежок удар на Башеску бидејќи тој, во суштина, ја губи контролата над владата непосредно пред претседателските избори, што е голема неповолност“, додава Сергиу.