Забраната за пушење во Хрватска е ревидирана

17/09/2009

Пушењето во кафулињата ќе се дозволи повторно, ако бидат исполнети основните услови.

Од Наташа Радиќ за Southeast European Times во Загреб -- 17/09/09

Сопствениците на кафулињата се приспособуваат на новите услови. [Getty Images]

Хрватското пушачко лоби извојува победа минатиот четврток (10-ти септември), кога парламентот усвои амандман на контроверзниот закон против пушењето. Амандманот им овозможува на пушачите да пушат во делови на кафулињата посебно наменети за тоа, ако имаат соодветен вентилациски систем и ако имаат видливи знаци што предупредуваат за опасностите од пушењето.

Рестораните, болниците, училиштата, канцелариите и баровите не се опфатени со амандманот, и пушењето е сé уште забрането во овие области.

Амандманот уследи по бунтот на сопствениците на кафулиња и ресторани, кои тврдат дека нивните бизниси скоро пропаднале откако законот, еден од најрестриктивните забрани за пушење во Европа, стапи на сила во мај.

За време на летните месеци пушачите честопати излегуваа надвор за да запалат цигара, но зимата е на прагот и сопствениците на кафулиња предвидуваат страшен пад на бизнисот.

Веднаш по усвојувањето на законот беше иницирана петиција, и владата истата ја зеде предвид. Новиот предлог беше подготвен со помош на Министерството за туризам, еснафот на сопственици на кафулиња и ресторани и владини претставници.

Сопствениците на кафулиња, кои почувствуваа мало олеснување, се надеваат дека полибералниот закон ќе ги врати пушачите во нивните објекти.

Жељко Стрижиќ, сопственик на кафуле покрај море, вели дека со новиот амандман, неговиот бизнис има иднина. Тој почнува со спроведување на измените во своето кафуле од 70 метри квадратни, за одвојување на пушачите од непушачите и веќе купи постер „пушењето убива“.

Министерот за здравство, Дарко Милиновиќ, силен поддржувач на забраната за пушењето, ги отфрли медиумските шпекулации дека владата ги направи овие измени на законот поради притисокот од еснафот на сопственици на кафулиња, чиј бизнис опадна за 75 отсто.

„И понатаму ќе работиме напорно на зачувување на здравјето на граѓаните и оваа одлука не беше донесена под никаков притисок“, рече Милиновиќ, додавајќи дека пушењето претставува сериозен проблем во Хрватска, бидејќи повеќе од 13.000 луѓе умираат годишно од болести поврзани со пушењето.

Еден на секои тројца Хрвати пуши.