Не се очекува голем победник на бугарските избори

02/07/2009

Околу 60 отсто од гласачите се очекува да излезат на гласање на парламентарните избори в недела. Овие избори се очекува да го дадат најфрагментираниот законодавен дом во последниве 20 години.

(Разни извори -- 01/06/09 - 02/07/09)

Минувач гледа во предизборен плакат во Софија во вторникот (30-ти јуни). [Getty Images]

Парламентарните избори в недела (5-ти јули) во Бугарија се очекува да ја дадат најрасцепканата влада од падот на комунизмот пред две децении.

Осум од 18 партии и коалиции регистрирани на изборите, најверојатно, ќе го надминат изборниот праг од 4 отсто за влез во следниот еднодомен парламент од 240 места, но ниту една нема да има чисто мнозинство, покажуваат анкетите.

Изборите ќе бидат први од 1989 година, на кои 31 од новите пратеници ќе бидат избрани преку мнозинско гласање, а преостанатите 209 со пропорционална застапеност.

Опозициската централно-десничарска партија Граѓаните за европски развој на Бугарија (ГЕРБ) се очекува да освои најголем дел од пропорционалните гласови, само еден месец откако доби највеќе гласови за Европскиот парламент (ЕП).

Последните анкети покажуваат дека партијата, која ја формираше софискиот градоначалник Бојко Борисов на крајот од 2006 година, ќе освои меѓу 26 и 34 отсто од гласовите.

Две партии, Бугарската социјалистичка партија (БСП) и Движењето за правата и слободите (МРФ) на етничките Турци, следат по ГЕРБ во анкетите. Коалицијата за Бугарија, предводена од БСП се очекува да биде на второто место со меѓу 17 и 25 отсто од гласовите, пред МРФ со 9 до 15 отсто од гласовите, според анкетите.

Ултранационалистичката партија Атака (Напад) и десничарската Сина коалиција, исто така, се очекува да освојат места. Изборите в недела може да им помогнат на некои наводни криминалци да избегнат затворска казна ако бидат избрани.

Пламен Галев и Ангел Христов -- кои се познати како озлогласените „Браќа Галеви“ -- беа ослободени од затвор минатиот месец со кауција од по 25.000 евра за секој од нив, бидејќи двајцата беа регистрирани како кандидати за парламентот. Двајцата мафијашки „босови“ од југозападниот град Дупница се обвинети за организирање и контрола на криминална група, која наводно применувала заплашување, физичка сила и пронуда.

Уставот предвидува имунитет за сите официјални кандидати на изборите, кој тие го задржуваат до крајот на својот мандат.

Изборите ќе се одржат во време на јавно незадоволство поради несправувањето на владејачката коалиција со корупцијата и организираниот криминал, кое не само што му наштети на имиџот на Бугарија, туку и доведе до замрзнување на стотици милиони евра помош на ЕУ.

Наводното купување гласови ги нарушува изборите уште од првите избори за ЕП во Бугарија во 2007 година. Повеќе од 16 отсто од гласовите на минатомесечните избори за ЕП беа или купени или на друг начин „контролирани“, според бугарскиот социолог Антони Галабов.

Околу 60 отсто од 6,9 милиони регистрирани гласачи во земјата, најверојатно, ќе излезат на гласање в недела.

Изборите ќе ги следат бугарски организации, Парламентарното собрание на Советот на Европа (ПАЦЕ) и ОБСЕ.