Македонската мистериозна планина

01/07/2009

Со митовите што кружат за Солунска Глава и зелениот мраз скриен во пештерите, македонската планина Јакупица нуди многу награди за авантуристите-планинари.

Од Зоран Николовски за Southeast European Times во Скопје -- 01/07/09 Фотографии на Дарко Андоновски

Според легендата, можете да го видите Солун, во Грција, од 2.540 метри височина.

Врвот Солунска глава, највисоката точка на планината Јакупица во централна Македонија, изгледа како мешавина од зелениното на швајцарските Алпи и убавината на американските Карпести планини.

Според легендата, можете да го видите грчкиот пристанишен град Солун од врвот висок 2.540 метри. Во македонскиот јазик, името на градот е Солун, а името на планината е буквално „Солунска глава“.

Митот, со текот на годините, привлекува голем број планинари, моторциклисти, параглајдеристи и љубители на пешачењето.

„Овде сум шест месеци, но сé уште не сум го видел морето. Никогаш не се знае, има време“, рече чуварот на телекомуникациска станица.

Дури и ако планинарите не успеат да го видат до крај Егејскиот брег, има многу други глетки што го одземаат здивот, како што е совршено мазната карпа Нежилово. Урош Жупанчиќ прв ја искачи во 1936 година.

Планинари, мотоциклисти, параглајдеристи и љубители на пешачењето, од Македонија и други земји, доаѓаат на Солунска глава.

Планинарите, исто така, велат дека кога е денот јасен, може да се види грчката планина Олимп и Вихрен во соседна Бугарија.

Малку подолу од врвот, на полето Бегово, има две пештери, во кои има зелен мраз и чудни инсекти.

Како што кажуваат овчарите на планините, диви волци, лисици, мечки и диви прасиња, исто така, талкаат во овие области. Рибарите тврдат дека речната пастрмка во водопадите на локалната река Кадина, по падините на планините Караџица и Китка, е најтешката риба за улов во земјата.

Љубителите на пешачењето кои сакаат да се искачат по планината Јакупица може да стигнат до Бегово поле и Солунска глава ако се качат по планинскиот пат јужно од главниот град на Македонија, Скопје, преку планините Китка и Караџица.

Од Солунска глава планинарите може да ја поминат ноќта во некој од камповите кои се наоѓаат на северната страна од планината.

Еден од овие кампови, Чеплес, се наоѓа на само неколку километри оддалеченост од врвот.

Камповите не се луксузни и чинат околу 2 евра на вечер -- мала цена што треба да се плати за да се слушне песната на птиците, да се дише свеж планински воздух и да се видат величенствени глетки.

Во текот на летото, Клубот на планинарски спортови Македон организира тридневно кампување за љубителите на пешачењето да ја доживеат македонската мистериозна планина.