Нова динамика во разговорите за името на Македонија?

25/06/2009

Состанокот на ОБСЕ на Крф ќе биде можност за разговори меѓу министрите за надворешни работи на Грција и Македонија, и претставникот на ОН Метју Нимиц вели дека е дојдено време процесот да оди напред. Сепак, и понатаму има сериозни пречки.

Од Марина Стојановска за Southeast European Times во Скопје -- 25/06/09

Maкедонија објави дека е подготвена да го реши својот спор со соседна Грција -- но не по цена на националниот идентитет. [EУ]

Посредникот назначен од ОН, Метју Нимиц, ќе ги посети Скопје и Атина од 6-ти до 9-ти јули, во рамките на напорите за изнаоѓање решение на долготрајниот спор околу името помеѓу Грција и нејзиниот северен сосед, Република Македонија.

Двете страни продолжија со разговорите оваа недела во Женева, по четиримесечен прекин. Разговорите беа подготовка за состаноците следниот месец, рече Нимиц, и не беше изнесен нов предлог.

Сепак, двете страни „изразија подготвеност за разговори и изнаоѓање решение“, рече претставникот. „Сега е вистинско време да се придвижи процесот на преговори“, додаде тој.

Во четвртокот (25-ти јуни) македонскиот министер за надворешни работи, Антонио Милошоски, рече дека гледа можност за нова динамика. На прес-конференцијата со словачкиот министер за надворешни работи во посета на земјата, Мирослав Лајчак, тој посочи дека престојната министерска конференција на ОБСЕ на Крф може да биде можност за поттикнување на дијалогот.

„Можни се нова динамика и темпо“, рече министерот за надворешни работи. Премиерот на државата, Никола Груевски, рече дека „сака работите да се движат во вистинската насока“.

Сепак, и покрај оптимистичкиот тон, остануваат основните камења на сопнување. Грција вели дека прифатливо име е само она кое би вклучилно географска определба, како на пример „северна“, и би било за меѓународна употреба.

Нејзиниот сосед, пак, вели дека земјите кои веќе ја нарекуваат „Република Македонија“ треба да продолжат да го прават тоа.

„Решението не смее да се наметнува врз земјите кои не признаа под нашето уставно име, а нивниот број е повеќе од 120“, рече македонскиот преговарач Зоран Јолевски. Секој договор, додаде тој, не смее да го компромитира ниту националниот идентитет, ниту да го прекрши уставот на Македонија.

Милошоски ја отфрли идејата за географска одредница како непотребна. Груевски, пак, рече дека договорот што ќе се постигне преку преговори, мора да биде ставен на референдум пред граѓаните.

Грција, во меѓувреме, продолжува со обвинувањата дека соседната земја има нефлексибилен пристап, и не е вистински посветена на решавањето на ова прашање.

Министерката за надворешни работи, Дора Бакојани, вели дека очекува „властите во Скопје да покажат поразличен политички пристап“, кој ќе биде ориентиран кон наоѓање взаемно прифатливо решение.

Таа потврди дека македонската влада побарала состанок меѓу нејзе и Милошовски за време на сесијата на ОБСЕ на Крф, и рече дека ќе се обиде да го договори.