Се намалува нивото на сиромаштија во Албанија

25/05/2009

Економскиот раст и реформите донесоа добри вести за сиромашните во Албанија, но актуелната светска финансиска криза претставува предизвик.

Од Мањола Хала за Southeast European Times во Тирана -- 25/05/09

Албанскиот Институт за статистика, Светската банка и Програмата за развој на Обединетите Нации го спроведоа истражувањето. [Getty Images]

Сиромаштијата во Албанија значително е намалена меѓу 2002 и 2009 година, покажа една нова студија. Во истата се заклучува дека бројот на Албанци што живеат под нивото на сиромаштија се намали од 25,4 отсто во 2002 година на 12,4 отсто во 2008 година.

Истражувањето го спроведе Албанскиот институт за статистика, Светската банка и Програмата за развој на Обединетите Нации (УНДП).

Во 2002 година имало околу 800.000 сиромашни луѓе, но повеќе од половина од нив -- 435.000 -- се извлекле од сиромаштината до 2008 година, покажа новата студија. Сиромаштијата драстично е намалена во руралните области, додека реалната потрошувачка е зголемена низ целата земја, односно, постигнат е раст од 7 отсто од 2005 година.

„Широки области во Албанија и понатаму имаат опаѓачки нивоа на сиромаштија“, се вели во соопштението за печатот на Светската банка. „Централните области имаа најголемо намалување на нивоата на сиромаштија од 2005 година.“

Меѓу причините за позитивната тенденција се: високиот раст на БДП, економските реформи, проширената инфраструктура и подобреното управување, се вели во студијата.

Централно-десничарската администрација на премиерот Сали Бериша си ги презема заслугите. „Намалувањето на сиромаштијата ... го покажува успехот на реформите што ги прави владата“, рече на прес-конференција министерот за интеграција, Мајлинда Брегу.

Опозициските партии, пак, велат дека вестите не се воопшто добри. Тие посочуваат на разликите меѓу различните региони и население.

„Неизедначеноста на регионалните приходи за секое семејство е многу голема во Албанија. Сиромаштијата во областа на Лежа изнесува 31 отсто, во Кукеш 37 отсто и во Дибер 41 отсто, што е над националниот просек“, рече Ервин Бушати, за трите северни планиски области на земјата.

И навистина, студијата покажа дека нивото на сиромаштија во планинските области не држи чекор со остатокот од земјата.

„Податоците покажуваат значително забавување во стапката на сиромаштија во планинските области, каде што процентот и понатаму е највисок и кои имаат мали измени од 2005 година“, соопшти Светската банка.

Студијата се потпира првенствено на податоците од мерните истражувањата за животниот стандард, од периодот април-јуни 2002 година, мај-јули 2005 година и јуни-август 2008 година, земени од примероците од скоро 3.600 домаќинства.

Резултатите не го одразуваат влијанието на актуелната светска финансиска криза. Претставниците на Светската банка и УНДП предупредуваат дека падот во нивото на сиромаштијата е можно да прекине или да се промени, ако не се преземат соодветни мерки. ММФ сигнализираше дека е можно да следат потешки времиња за Албанија, предвидувајќи намалување на растот на БДП на 0,4 отсто оваа година, од 6,8 отсто во 2008 година.