Студија покажа дека софтверското пиратство е во пораст

13/05/2009

Централна и Источна Европа останаа регион со највисока стапка на софтверско пиратство во светот минатата година, покажа извештајот објавен во вторникот.

(ВСЈ, АФП, Ројтерс, Ксинхуа, Софија ечо, Novinite.bg, Meдиафакс, Бизнис софтвер алијанс - 12/05/09)

Софтверското пиратство ги чини претпријатијата 38,8 милијарди евра -- 11 отсто повеќе отколку минатата година. [AФП]

Загубите што го претрпеле претпријатијата поради софтверското пиратство на компјутерите ја надмина сумата од 3,7 милијарди евра минатата година, се вели во годишниот извештај од вторникот (12-ти мај) на Бизнис софтвер алијанс (БСА).

И покрај тоа што е постигнат одреден напредок во намалувањето на нелегалната употреба на софтверските компјутерски производи „светската стапка на пиратство скокна од 38 отсто во 2007 година, на 41 отсто во 2008 година“, според студијата спроведена од ИДЦ, водечко претпријатие за информатичко разузнавање, за БСА.

Според извештајот, стапките на пиратство, всушност, паднале или останале непроменети во 93 од 110 испитани земји.

Заменик-претседателот на БСА Џефри Харди го припиша целокупното зголемување на „математичкиот исход од побрзиот раст на компјутерските пазари во економиите со повисока стапка на пиратство“.

Монетарната вредност на нелиценцираниот софтвер се зголеми за повеќе од 3,7 милијарди евра за период од една година, на околу 38,8 милијарди евра во 2008 година. „Настрана од влијанието на девизните курсеви, загубите се зголемија за 5 отсто“, се додава во извештајот.

И покрај падот од два процентни поени, Централна и Источна Европа (ЦЕЕ) останаа регион со највисока стапка на пиратство, од 66 отсто. Следна е Латинска Америка, со 65 отсто веќе втора година по ред. Азиски Пацифик беше единствениот регион каде што употребата на илегални компјутерски софтверски производи порасна -- од 59 отсто во 2007 година на 61 отсто минатата година, доведувајќи ги загубите на претпријатијата до повеќе од 11 милијарди евра.

„Земји со најниска стапка на пиратство се САД, Јапонија, Нов Зеланд и Луксембург, сите близу 20 отсто“, се вели во извештајот. Во исто време, поради нејзината големина, САД е земја со најголеми монетарни загуби од пиратството, од преку 6,6 милијарди евра.

Загубите на регионот на ЦЕЕ изнесуваа 5,1 милијарда евра од целокупните загуби што ги претрпеа софтверските претпријатија минатата година, при што делот на Русија во таа сума изнесуваше 3,1 милијарда евра.

Балканските земји со највисока стапка на пиратство се Црна Гора (83 отсто), Албанија (77 отсто) и Србија (74 отсто), додека Хрватска остана со најниска стапка во регионот, втора година по ред, со 54 отсто.

Иако компјутерското софтверско пиратство на Романија падна за два процентни поени, на 66 отсто, загубите што ги претрпеа софтверските претпријатија во земјата пораснаа за 65 отсто.

„Овој извештај го покажува влијанието [на] напорите за намалување на софтверското пиратство во Романија“, романската новинска агенција Медиафакс ја цитираше локалната претставничка на БСА, Магда Попеску, во вторникот.

Стапката на пиратство во Бугарија и Македонија останува непроменета, односно 68 отсто, веќе втора година по ред. Но, загубите што ги претрпеа бугарските претпријатија двојно се зголемија. Во Македонија загубите пораснаа за 21 отсто.