Србија се бори против пушењето

20/04/2009

Србија е меѓу европските земји со најголем број пушачи. Министерството за здравје предложи понатамошно ограничување на пушењето во јавните и затворени простори.

Од Бојана Миловановиќ за Southeast European Times во Белград -- 20/04/09

Скоро 30 отсто од жените во Србија пушат. [Никола Барбутов/SETimes]

Србија е меѓу европските земји со најголем процент пушачи. Според Министерството за здравство, околу една третина од вкупно 7 милиони граѓани на Србија пушат, скоро 38 отсто од мажите и 30 отсто од жените.

Срмена Крстев, претседателка на српската Комисија за спречување на пушењето, за Southeast European Times изјави дека возраста на која се почнува со пушење постојано се намалува. „Околу 8 отсто до тинејџерите, на возраст меѓу 13 и 15 години, одвреме-навреме палат цигара. Третина од нив ја испушиле првата цигара на 10 години“, рече таа.

Во некои земји, како што се Грција и Турција, скоро половина од мажите пушат. Но, процентот на жените кои пушат во овие земји е многу помал отколку во Србија. „Единствен ,ривал’ на Србија по бројот на пушачи меѓу европските земји е Босна и Херцеговина“, рече таа.

Заради справување со сé поголемиот број здравствени проблеми што ги предизвикува пушењето, Министерството за здравство ги предложи постојните амандмани на законот со кои се забранува пушење во затворени простории. Новиот закон ќе биде построг и ќе ги покрива сите јавни објекти и работни места, вклучително и кафулињата, рестораните и другите услужни објекти.

Белград има намера да го хармонизира овој закон со оние во Европа. Спроведувањето ќе се врши во фази: прво ќе се забрани пушењето на работното место; следно, ќе се определат делови за пушачи во јавните објекти како што се рестораните; и на крајот, целосно ќе се забрани пушењето на јавните места. Спроведувањето на законот нема да биде лесно и се очекува отпор. За да се избегнат можни проблеми, „документот ... ќе биде многу јасен и неговото спроведување ќе биде стриктно дефинирано“, рече Крстев.

Свеста за штетните последици од пушењето расте, особено од опасноста од пасивното пушење. „Ако една третина од населението пуши, мораме да мислиме за другите две третини ... чие здравје е доведено во опасност“, додаде таа.

Министерството за здравство планира серија интензивни кампањи за посистематско ширење на пораката, рече Крстев. Актуелната кампања -- „Чадот од цигари е сериски убиец“ -- има за цел да ги уплаши пушачите и тие да се загрижат за своето здравје. Истата веќе покажува резултати: од 2006 до 2008 година, 7 отсто од мажите и 3 отсто од жените се откажале од пушење.

Следната кампања ќе биде апел до пушачите: „Откажете се од пушењето“. Целта е да се посочи дека пушењето предизвикува голем број болести, од кои некои се смртоносни.

Цигарите се најчестата причина за малигните болести, мозочниот удар и инфарктот. Пушењето е особено штетно за време на бременоста, рече Крстев, и може да предизвика сериозни здравствени проблеми кај децата многу подоцна во животот.