Малку познат пејач ќе ја претставува Србија на Евровизија 2009

11/03/2009

Марко Кон ќе ја претставува Србија на овогодинешната Евровизија во Москва. Неговата победа ги изненади и критичарите и јавноста.

Од Игор Јовановиќ за Southeast European Times во Белград -- 11/03/09

Марко Кон (во средината) ќе ја претставува Србија во Москва. [Никола Барбутов]

Малкупознатиот српски пејач и композитор Марко Кон изненади многумина станувајќи претставник на својата земја на 54-тата Евровизија во Москва.

Кон ќе ја изведе "Чевел" во дует со хармоникашот Милан Николиќ. Кон има ексцентричен изглед, а најкарактеристична му е русата афро-фризура.

Кон беше изненаден од победата. „Сé уште не сум сосема свесен дека победив. Во шок сум. Знам дека некои други беа фаворити, но ете -- ние победивме“, рече тој.

„Чевел“ е поп-песна со подлога од српски етно звуци. Истата ја кажува приказната за човек кој бил одбиен од жена, која очекувала да стане богат.

Многумина се скептични за шансите на Кон за победа во Москва. Притисокот за успех се очекува да расте, со оглед на тоа што Србија беше домаќин на Евровизијата минатата година, привилегија што ја доби откако пејачката Марија Шерифовиќ победи на натпреварот во 2007 година во Хелсинки со нејзината песна „Молитва“. Другите српски претставници постигнуваа висок пласман во минатите години, како што е второто место во 2004 година кога државата се натпреваруваше како Србија и Црна Гора (Жељко Јоксимовиќ, „Лане моје“).

Победата на Кон и Николиќ ја подели публиката, поради што голем број посетители ја напуштија салата разочарани. Победничката песна доби максимум гласови од жирито, но публиката, која гласаше преку СМС-пораки, й додели седум од максималните 12 поени.

Скандал, не само разочарувањето од победникот, го наруши српскиот натпревар. Десет натпреварувачи требаше да се појават во финалето, но грешката во пресметката на гласовите од публиката доведе до тоа организаторите да најават дека уште двајца натпреварувачи ќе учествуваат во финалето. Двајцата по грешка беа елиминирани во полуфиналињата.

Но, еден од натпреварувачите одби да се појави, поради што Србија имаше чудно финале од 11 натпреварувачи. Двајца членови на организацискиот одбор, поради ова, поднесоа оставки на функциите.

Покрај ова, новинарите наводно забележале како обезбедувањето на натпреварот го исфрла поранешниот менаџер на победничката од 2007 година Шерифовиќ поради тоа што немал пропусница да биде зад сцената.

Според првичните реакции на критичарите, песните на овогодинешниот натпревар го немаа квалитетот од изминатите години. Актуелните евровизиски претставници на Србија ќе имаат тешка задача да го достигнат успехот на своите претходници.