Караџиќ повторно одби да се изјасни

04/03/2009

Судијата изрече изјаснување „невин“ по 11-те точки од обвинението за геноцид и воени злосторства со кои се соочува Радован Караџиќ, откако поранешниот водач на босанските Срби одби да се изјасни на рочиштето во вторникот во Хаг.

(ФT - 04/03/09; AП, АФП, Ројтерс, Блумберг, ДПА, АКИ, ББС, ВОА, РТТЊус, Бета, Б92 - 03/03/09)

Припадник на обезбедувањето ја проверува актовката на поранешниот водач на босанските Срби Радован Караџиќ (десно) во вторникот (3-ти март) во Хаг. [Getty Images]

Поранешниот водач на босанските Срби Радован Караџиќ одби да се изјасни по обвиненијата за воени злосторства и геноцид за време на рочиштето во Меѓународниот кривичен трибунал за поранешна Југославија (МКТЈ) во вторникот (3-ти март), исто како и пред околу шест месеци.

„Овој Трибунал нема никакво право да ми суди“, му рече тој на судијата Иан Бономи, кој претседаваше со сесијата во Хаг.

Судот го свика рочиштето во вторникот откако обвинителите на ОН поднесоа изменато обвинение против Караџиќ минатата недела, околу седум месеци по неговото апсење. Истото го товари по две точки за геноцид, пет точки за злосторства против човештвото и четири точки за кршење на правилата и обичаите на војување за време на конфликтот во Босна и Херцеговина (БиХ) во периодот 1992-1995 година.

Обвинителството го намали бројот на наводните места на злосторствата од 41 на 27.

Случајот на Караџиќ е сé уште во предсудска фаза. Соочувајќи се со судот на рочиштето минатиот август, тој одби да се изјасни по претходното обвинение. Во согласност со регулативите на МКТЈ, судијата тогаш изрече изјаснување „невин“ по секоја точка од обвинението.

Бономи мораше да ја повтори таа процедура за време на кусото рочиште во вторникот.

Караџиќ (63) му се пожали на судот дека не му дал доволно време да собере правни советници.

„Моето време е скратено“, рече тој. „Сé уште немам сопствен тим, без моја вина.“

Како и поранешниот југословенски претседател Слободан Милошевиќ, Караџиќ се брани самиот во МКТЈ. Неговото однесување во судот и неговите бројни поднесоци доведоа до тоа многумина да веруваат дека планира да ја искористи тактиката на одложување, која за првпат ја употреби неговиот воен ментор.

Караџиќ го искористи рочиштето во вторникот за да ги повтори своите тврдења за наводен таен договор што го постигнал со поранешниот американски претставник Ричард Холбрук во 1996 година, со кој му бил даден имунитет од судско гонење на МКТЈ во замена за неговото напуштање на јавниот живот.

Холбрук, кој помогна во посредувањето за Дејтонскиот мировен договор од 1995 година, со кој беше ставен крај на конфликтот во БиХ, категорично тврди дека не дал такво ветување.

Соочени со крајниот рок во 2010 година, за завршување на сите случаи, вклучително и жалбите, судиите и обвинителите на МКТЈ се обидуваат да ги забрзаат преостанатите 18 случаи.

МКТЈ и ЕУ вршат притисок врз Србија да ги предаде преостанатите двајца бегалци обвинети за воени злосторства од балканските конфликти во 1990-тите, кои сé уште ги бара Трибуналот на ОН, особено поранешниот воен командант на босанските Срби, Ратко Младиќ. Друг обвинет на МКТЈ кој сé уште се наоѓа на слобода е воениот водач на хрватските Срби Горан Хаџиќ.