Косово ја прославува првата годишнина помеѓу восхит и разочараност

17/02/2009

Косовските граѓани во вторник прават една година од независноста. Србија, пак, вели дека нема никогаш да ја признае државата.

Од Блерта Фониќи-Кабаши и Игор Јовановиќ за Southeast European Times во Приштина и Белград -- 17/02/09

Многумина се приклучија на прославите на главниот плоштад во Приштина, каде што се вееја знамињата на државите што ја признаа новата држава. [Лаура Хасани]

Косово започна со прославите на својата прва годишнина како независна држава во понеделникот (16-ти февруари). Косовските и албанските знамиња се вееја насекаде во главниот град на новата република, која е признаена од 54 држави.

Сепак, кај многу граѓани восхитот од независноста на државата премина во разочараност поради континуираното насилство во северниот дел, високата стапка на невработеност и немањето универзално дипломатско признавање.

Премиерот Хашим Тачи, сепак, тврди дека целата прва година на Косово како суверена држава е „целосен успех“.

„Ќе бидеме признаени од целиот свет“, изјави тој за АП во понеделникот. „Ние градиме татковина за целиот косовски народ.“

Претседателот на парламентот, Јакуп Красниќи, им честиташе на граѓаните и ги спомена настаните од изминатата година. „Годишнината од независноста поминува во знакот на историските постигнувања на Косово на домашната и меѓународната сцена“, рече тој. „Се сеќаваме со гордост на мачениците кои загинаа за слободата и независноста на Косово.“

Многу земји кои ја признаа државата испратија честитки, соопшти кабинетот на претседателот Фатмир Сејдиу во понеделникот.

„Соединетите Држави ќе продолжат со поддршката за мултиетничко, независно и демократско Косово“, напиша американскиот претседател Барак Обама.

Но, овој ден не го прославуваше целата нација. Српската политика во однос на Косово останува непроменета -- повеќето српски партии велат дека никогаш нема да ја признаат „нелегалната“ независност на Косово, дури и ако признанието биде услов за членството во ЕУ.

Според извештаите на медиумите, одреден број српски пратеници отпатуваа со автобус од Белград до Звечан во северно Косово, каде што многумина планираа да покажат солидарност присуствувајќи на седницата на самопрогласениот парламент на етничките Срби.

Српскиот претседател Борис Тадиќ вели дека Косово е „најчувствителното прашање за Србија“, како и за регионалната и европската безбедност, кое Србија ќе се обиде да го реши преку дипломатски средства.

Тадиќ додаде дека за Белград 17-ти февруари е „само датум кога е направен еден нелегален чин, кога Приштина нелегално го направи Косово самопрогласена држава“.

Во меѓувреме, Белград најави бројни дипломатски иницијативи со цел спроведување на планот од шест точки на ОН за Косово.

Српскиот министер за надворешни работи, Вук Јеремиќ, во вторникот во Њујорк се состана со генералниот секретар на ОН, Бан Ки-Мун, а шефот на УНМИК, Ламберто Заниер, ќе го посети Белград в четврток. „Планот од шест точки не постои за Косово“, рече косовскиот вицепремиер Раме Манај, искажувајќи го долготрајниот став на Приштина во врска со овој план.