Српскиот суд ги потврди пресудите за убијците на Ѓинѓиќ

30/12/2008

Српскиот Врховен суд во понеделникот ги потврди казните за деветмината осудени за убиството на Зоран Ѓинѓиќ, но ги намали оние што им беа изречени на тројцата други учесници.

(Бета, Б92, Радио Србија, АП, ВОА, Javno.hr - 29/12/08)

Паравоениот командант Милорад Улемек (во средината), беше прогласен за виновен во 2007 година за организирање на атентатот. [Getty Images]

Врховниот суд на Србија во понеделникот (29-ти декември) ги потврди пресудите за деветмина од 12-мината осудени учесници во атентатот од 2003 година на премиерот Зоран Ѓинѓиќ. Истиот ги намали казните што им беа изречени на тројцата други членови на групата.

Судот ја потврди затворската казна во траење од 40 години што им ја изрече белградскиот Специјален суд за организиран криминал во мај 2007 година на Милорад Улемек - Легија и Звездан Јовановиќ, главните осомничени за убиството на првиот српски демократски избран премиер.

Судиите го прогласија Улемек, поранешен командант на озлогласената специјална полициска единица, позната како Црвени баретки, за виновен за организирање на нападот на Ѓинѓиќ, кој почина од канонада куршуми пред зградата на владата во Белград на 12-ти март 2003 година. Тие, исто така, го прогласија Јовановиќ, кој беше негов заменик во Црвените баретки, за виновен за притискање на чкрапалото.

Врховниот суд дополнително ја потврди 35-годишната казна за Александар Симоновиќ, Нинослав Константиновиќ и Владимир Милисављевиќ, сите членови на криминалната група наречена Земунски клан. Истиот ја потврди 30-годишната затворска казна што им беше изречена на двајца други членови на истата банда, Милош Симоновиќ и Милан Јуришиќ, и на поранешниот службеник на Безбедносно-информативната агенција Бранислав Безаревиќ, како и осумгодишната казна на поранешниот член на Црвените баретки Саша Пејаковиќ.

Но, високиот суд, одреди и некои намалувања на казните, како на пример на 35-годишната затворска казна на Сретко Калиниќ од Земунскиот клан, на 30 години, пресудувајќи дека покуса затворска казна ќе биде посоодветна за неговата улога во атентатот. Имајќи го предвид признанието на Душан Крсмановиќ, судиите му ја скратија за десет години неговата првична затворска казна од 30 години. Поранешниот припадник на Црвените баретки Жељко Тојага - Жмиги доби преполовување на неговата 30-годишна затворска казна, бидејќи судот пресуди оти тој учествувал само во еден дел од заговорот за убиство на Ѓинѓиќ, имено, обидот за организирање сообраќајна несреќа на 21-ви февруари 2003 година во Белград.

Целта на заговарачите била враќање на соработниците на поранешниот претседател Слободан Милошевиќ на власт, спречување на прозападните реформи и спречување на какви било понатамошни екстрадиции на осомничените за воени злосторства во Трибуналот на ОН за воени злосторства во Хаг, се вели во пресудата.

Според белградската новинска агенција Бета, пресудата на Врховниот суд од понеделникот ги категоризира кривичните дела извршени од страна на Улемек како заговор заради противуставни дејства. Портпаролката на судот, Весна Дабиќ, истакна дека Улемек и Јовановиќ, кои добија максимални казни, сега се соочуваат со рок од 15 дена за поднесување жалби, ако сакаат да го сторат тоа, и Врховниот суд потоа ќе заседава за да донесе одлука во случајот.