Советот за безбедност на ОН го одобри планот од шест точки на Бан

27/11/2008

Планот на генералниот секретар на ОН за распоредувањето на ЕУЛЕКС доби едногласна поддршка од членовите на Советот за безбедност. Приштина изрази сериозна резервираност, но рече дека ќе соработува со меѓународната заедница.

Од Блерта Фониќи-Кабаши за Southeast European Times во Приштина – 27/11/08

Советот за безбедност на ОН го отвори патот за мисијата на ЕУ во Косово во средата (26-ти ноември). [Getty Images]

Советот за безбедност на ОН во средата (26-ти ноември) ја даде својата поддршка за планот за реструктуирање на УНМИК и распоредување на европска полициска и правна мисија во Косово. Членовите едногласно го одобрија планот од шест точки на генералниот секретар на ОН, Бан Ки-Мун, со кој се овластува распоредување на мисијата на ЕУЛЕКС на целата територија на Косово.

Косовските водачи се спротивставија на планот на Бан, врз основа на тоа дека истиот ќе ги ослабне ингеренциите на косовските институции. Министерот за надворешни работи, Скендер Хисени, ги повтори овие приговори во вторникот, изјавувајќи пред Советот за безбедност дека неговата земја е подготвена да соработува, но не сака нејзиниот суверенитет да биде доведен во прашање.

„Косово не е против меѓународната заедница и ние сме заинтересирани за тесна соработка со нив. Но, не ги признаваме плановите кои претставуваат закана за нашиот суверенитет“, рече тој. Тој предупреди дека планот од шест точки ќе создаде два паралелни синџири на власт, попречувајќи ги напорите на Приштина за ставање на целата земја под нејзина управа.

Србија, кој првично се спротивставуваше на распоредувањето на ЕУЛЕКС, се согласи со изменетата верзија на предлогот на Бан. Според истата, распоредувањето останува одвоено од планот на Ахтисари за надгледувана независност, кој не доби одобрување од Советот за безбедност. Српските енклави ќе имаат значителна самоуправа, вклучително и над полицијата.

Србија и понатаму тврди дека независноста на Косово е нелегитимна. Нејзин силен сојузник во Советот за безбедност, Русија, го блокираше планот на Ахрисари и сега предупредува дека декларацијата за независност би можела да води до поделба на покраината.

„Постои де факто поделба на Косово“, рече рускиот амбасадор во ОН, Витали Чуркин.

Соединетите држави и другите западни земји и понатаму го поддржуваат Косово, истовремено повикувајќи на брзо распоредување на ЕУЛЕКС. „Независноста и суверенитетот на Косово се нешто за што не може да се преговара“, рече британскиот амбасадор во ОН, Џон Соерс.

Шефот за безбедност на ЕУ, Хавиер Солана, рече дека мисијата од 2.000 припадници би требало да се распореди низ цело Косово до средината на декември.