Несреќа го сврте вниманието на условите во романските рудници

25/11/2008

Некои работници во рудниците Петрила, каде што загинаа повеќе од десет лица во двојната експлозија претходно овој месец, велат дека управата ги игнорирала предупредувањата.

Од Пол Чикои за Southeast European Times во Букурешт – 25/11/08

Смртоносната експлозија на гасот метан предизвика двојна експлозија во рудниците Петрила на 15-ти ноември. [Getty Images]

Додека Романија се тресе од катастрофата овој месец во рудниците Петрила, зголеменото внимание се фокусира на практиките на рударската индустрија. Критичарите говорат за игнорирани предупредувања и притисок врз рударите да се вратат на несигурните работни места.

Експлозиите од 15-ти ноември во романската Долина Јиу беа најголем ваков инцидент во земјата од 2001 година. Концентрацијата на гасот метан доведе до две експлозии, при што втората ги десеткуваше спасувачките екипи кои одговорија први.

Осуммина рудари и четворица спасувачи загинаа на местото, додека десетици беа хоспитализирани со изгореници. Тринаесеттиот рудар почина во болница во понеделникот (24-ти ноември), десет дена по несреќата.

„Не мораме да продолжиме со убивање на луѓето во рудниците“, рече претседателот Трајан Башеску при посетата на местото на несреќата. Тој ги повика властите да ги подобрат работните услови.

Истрагата ги разгледува поплаките на роднините на жртвите дека управата веќе знаела за проблемот во рудникот неколку дена пред експлозиите, при што некои рудари веќе имале изгореници. Обвинителите извршија накрстен распит на менаџерите во Националното претпријатие за јаглен (ЦНХ) во Петросани.

Според извештајот на телевизиај Реалитатеа, рударите им кажале на своите надзорници за својата загриженост, но тие сепак морале да се вратат на работа. Маријан Холбан, водач на синдикатот на рударите, поднесол тужба до локалната полиција, тврдејќи дека добил смртни закани откако се појавил во телевизиско шоу каде што говорел за лошите работни услови во рударскиот сектор.

Министерот за економија, Варујан Восганијан, ја суспендираше управата на ЦНХ до завршувањето на истрагата. Тој, исто така, побара истрага за државните субвенции. Официјалните цифри покажуваат дека ЦНХ акумулирал 1,3 милијарди евра долг кон државата, што го прави најголем должник.

Романската влада одвои финансиска помош за семејствата на жртвите -- 2.600 евра за роднините на загинатите и тешко повредените и 1.300 евра за другите повредени.

Букурешт ќе издаде специјални студентски грантови за 13 деца чии татковци загинаа минатата недела во рударската несреќа. Властите во округот и ЦНХ, исто така, ветија значителна финансиска помош.

Премиерот Калин Попеску Таричеану, пак, предупреди да не се извлекуваат прерани заклучоци. „Мораме да почекаме за резултатите од истрагата и да избегнеме шпекулации дотогаш“, рече тој.

Последниот инцидент во Петрила се случи во 1982 година, во времето на Чаушеску, и беше исто толку тежок. Четиринаесет рудари загинаа, а 15 беа повредени.