Полицијата во БИх се бори со шверцерите на оружје

06/11/2008

Меѓународните синџири на шверц се целта на големата полициска операција што се спроведуваше во изминативе неколку месеци.

Од Јусуф Рамадановиќ за Southeast European Times во Сараево – 06/11/08

Операцијата резултираше со запленети големи количини оружје и други смртоносни материјали. [Getty Images]

Преку широката меѓународна операција, полицијата во Босна и Херцеговина (БиХ) вложува засилени напори за потиснување на синџирите организиран криминал кои шверцуваат оружје преку нејзината територија за другите синџири што оперираат во земјите на ЕУ.

Операцијата Запад беше спроведена во изминативе неколку месеци во БиХ и некои од нејзините соседни земји. Полицијците од Федерацијата на БиХ и Република Српска соработуваа со колегите во соседните земји и во некои членки на ЕУ, вклучително и Словенија, Франција, Австрија и Хрватска. Државната агенција за информации и заштита (СИПА) беше, исто така, вклучена.

Од јануари, кога започна истрагата, полицијата заплени големо количество оружје и други смртоносни материјални, како што се автоматски пушки, лансирни рамки за проектили, пиштоли, автоматски оружја, рачни гранати, различна муниција, детонатори и резервни делови за оружје.

Меѓу запленетиот материјал имаше и пентрит, експлозив кој е помоќен од ТНТ. Фабриките во поранешна Југославија го произведуваа за армијата на земјата. Шверцерите имале намера да ја препродадат муницијата во земјите од Западен Балкан по многу повисоки цени од оние на Балканот или за потенцијални терористички напади.

Во текот на септември, полицијата уапси шест лица, наводно вклучени во криминален синџир, четворица во БиХ и двајца во Словенија. Тие издадоа потерници за двајца други осомничени кои живеат во Франција. Во оваа операција, полицијата заплени 62 килограми пентрит, како и големо количество автоматско оружје, антитенковски ракети, детонатори и муниција.

На прес-конференцијата во Љубљана, Словенија, портпаролот објасни дека синџирот бил многу добро организиран и им давал на сите членови конкретни задачи. Неговата намера била да шверцува големо количество оружје и муниција во земјите на ЕУ и да извлекува големи профити.

За време на неколкумесечната истрага, властите ја идентификуваа Словенија како транзитна земја за нелегално оружје кое се шверцува од Западен Балкан во земјите на ЕУ.

Околу средината на октомври, во друг дел од операцијата, СИПА спроведе рација во многу локации во централна Босна и областите на големите градови Сараево, Бања Лука и Зеница. Таа уапси шест лица, кои ги предаде на државниот обвинител за понатамошен процес. Полицијата откри за време на истрагата дека бројни „пратки“ со оружје отишле неоткриени во земјите на ЕУ, каде што шверцерите ги продале.

На прес-конференцијата во Сараево, Драган Лукач, заменик-директорот на СИПА, ја оспори точноста на некои меѓународни извештаи, во кои се споменуваше можна поврзаност помеѓу рекетите на шверцерите со оружје и Ал каеда.

Шестмината осомничени уапсени во октомври се од различно потекло, рече Лукач, опишувајќи ги како „мултиетничка група на криминалци“.