Некои ја менуваат хрватската сала за состаноци за учество во предизборната кампања

22/10/2008

Бизнисмените во Хрватска традиционално се држат настрана од политиката, но ситуацијата брзо се менува.

Од Наташа Радиќ за Southeast European Times во Загреб -- 22/10/08

Се шпекулира дека генералниот директор на „Агрокор“ Ивица Тодориќ е можно да се кандидира за претседател на Хрватска во 2010 година. [Архива]

Со приближувањето на локалните избори во 2009 година, сé повеќе големи бизнисмени калкулираат дали да влезат во политиката и како да освојат гласови. Досега двајца богати кандидати отворено ги признаа своите политички амбиции.

Сопственикот на синџирот супермаркети со седиште во Сплит Жељко Керум ќе биде независен кандидат за градоначалник на Сплит, додека тутунскиот магнат Плинио Кукурин се надева дека ќе ја освои политичката сцена во Истра.

Досега повеќето бизнисмени избегнуваа да бидат во фокусот на вниманието. Тие обично избираа да не се врзуваат себе си за партија или да станат премногу приврзани за одреден водач или кандидат. Меѓу долгогодишните политичари во земјата, само тројца доаѓаат од бизнис секторот: водачот на Хрватската народна партија Радмир Чачиќ, заменик-претседателот на парламентот Стипе Габриќ Џамбо и поранешниот министер за економија, Горанко Физулиќ, сопственик на синџирот детски продавници „Турбо лимач“.

Сега работите се менуваат брзо. Сега кога Керум и Чучурин влегуваат во игра, најверојатно ќе следат и други познати бизнисмени. Според хрватскиот неделник Глобус, генералниот директор на „Агрокор“ Ивица Тодориќ размислува да се кандидира за претседател во 2010 година. Човекот кој се смета за најбогат во Хрватска, води корпоративна империја која се гордее со повеќе од 30.000 вработени.

Ако се кандидира Тодориќ, можно е да се соочи со конкуренција од Јуре Радиќ, близок соработник на починатиот претседател Фрањо Туѓман. Радиќ сега го предводи најголемото претпријатие за градежништво и инженеринг во Хрватска ИГХ.

Уште еден потенцијален кандидат е Надан Видошевиќ, претседател на хрватската Стопанска комора. Како и Радиќ и Тодориќ, и тој е на десната страна од политичкиот спектар.

Не го поздравуваат сите овој нов тренд. Според Инга Томиќ Колудровиќ, шеф на Хрватското социолошко здружение, потегот на бизнисмените за влегување во политичката арена не е најпаметен.

„Тоа нема да донесе ништо добро за општеството“, изјави Колудровиќ за Глобус. „Овие два дела од општеството треба да бидат одвоени, а не обединети. Бизнисмените сакаат профит, додека политиката треба да работи за доброто на народот.“

Но, кандидатите од бизнис секторот имаат различно мислење. Тие тврдат дека нивното искуство и врски ќе им помогнат да обезбедат економска полза за нивните гласачи. Во пазарната економија, прашуваат тие, кој е подобро подготвен да ги претставува интересите на Хрватите? Во 2009 година гласачите се тие што ќе одговорат на ова прашање.