Водачот на српската опозиција поднесе оставка од партиските функции поради ДСА

08/09/2008

Томислав Николиќ, вршителот на претседателската функција во српската ултранационалистичка Радикална партија, поднесе оставка од функцијата поради несогласувањата во својата партија за иднината на земјата во ЕУ.

(ФТ, АКИ, Еуобсервер - 08/09/08; ББС, Б92 - 07/09/08; AП, АФП, Ројтерс, ДПА, Блумберг, Бета, Б92 - 06/09/08)

Заменик-претседателот на СРС, Томислав Николиќ, ја поднесе својата оставка во петокот (5-ти септември). [Getty Images]

Оставката на Томислав Николиќ од функцијата заменик-претседател на ултранационалистичката Српска радикална партија (СРС) и шеф на нејзината парламентарна група, ќе ја заслабне главната српска опозициска партија, рекоа политичките аналитичари во неделата (7-ми септември).

Николиќ поднесе оставка по состанокот на претседателството на СРС во петокот вечер, кога повеќето членови на партијата одлучија да не ја поддржат ратификацијата на српскиот Договор за стабилизација и асоцијација (ДСА) со ЕУ.

Потпретседателот на СРС, Драган Тодоровиќ, во неделата потврди дека партискиот водач, Воислав Шешељ, кому моментно му се суди во Хашкиот трибунал на ОН за воени злосторства, учествувал на состанокот преку телефон. Сепак, тој ги негираше извештаите на медиумите дека Шешељ му наредил на партиското раководство да го отфрли предлог-законот за ратификацијата на ДСА.

Николиќ во четвртокот рече дека СРС, најголемата партија во српскиот парламент од 250 места, ќе го поддржи клучниот договор со ЕУ, по прифаќањето од страна на владата на нејзиниот предлог за амандман на законот. Подоцна истиот ден Шешељ нареди радикалите да гласаат против ДСА, објасни тој во саботата.

„Поднесов оставка бидејќи сакав да покажам дека можам да издржам сé, но ова не“, рече Николиќ, кој, всушност, ја водеше СРС повеќе од пет години.

Кога Шешељ му се предаде на Хашкиот трибунал во февруари 2003 година, партијата имаше 300.000 гласачи, изјави аналитичарот Славиша Орловиќ за белградски Б92 во неделата, истакнувајќи дека СРС ја освои поддршката на „уште еден милион“ гласачи откако Николиќ го презеде водството.

„Тоа само потврдува дека модернизацијата на партијата со Шешељ на нејзиното чело е невозможна“, рече тој, додавајќи дека не е јасно дали Николиќ ќе побара од своите следбеници во парламентарната група на СРС да гласаат за ДСА, или да ги следат партиските наредби. „Тоа ќе зависи од неговата оценка на колку луѓе може да смета, ако одлучи да ја подели партијата или да формира нова.“

Други се согласуваат дека оставката на Николиќ ќе има сериозни последици за иднината на СРС и дека таа нема да може да ги задржи своите позиции.

„Оваа поделба сигурно ќе ја ослабне Радикалната партија“, рече аналитичарот Драган Бујошевиќ. „Партијата никогаш нема да ги постигне резултатите што ги имаше со Томислав Николиќ.“

Позициите на радикалите ќе бидат уште повеќе поткопани ако и други членови одлучат да ги напуштат партиските редови и да се приклучат на евентуалната нова партија, истакнуваат други.

„Ако попаметната фракција на СРС, предводена од Николиќ, ја напушти партијата, влијанието на радикалите на српската политичка сцена значително ќе се намали“, италијанската новинска агенција АКИ ја цитираше изјавата на аналитичарот Милан Николиќ.

Според извештаите од неделата, Николиќ поднесе оставка само од својата партија, но не го напушта парламентот.

Според извештајот на Б92 од понеделникот, Тодоровиќ ќе биде шеф на парламентарната група на СРС. Партијата не се очекува да избере нов заменик-претседател до следниот состанок на нејзината Централна татковинска администрација, закажан за две години.

„Дотогаш, партијата ќе биде предводена од претседателот Шешељ, претседателството, Централната татковинска администрација и партиските одбори“, беше цитирана изјавата на функционерот на СРС Милорад Мирчиќ во понеделникот.