Продавниците во Хрватска можеби ќе го продолжат работното време до полноќ

03/09/2008

Новите, ублажени прописи за работното време на продавниците предизвикаа огорченост кај синдикатите и Црквата.

Од Наташа Радиќ за Southeast European Times во Загреб -- 03/09/08

Новата регулатива во Хрватска дозволува продавниците да останат отворени до полноќ. [Архива]

Продавниците во Хрватска порано беа отворени од 6 часот изутрина до 9 часот навечер. Сега, со новата регулатива, сопствениците може да си одредат сопствено работно време, оставајќи го вратите отворени до полноќ.

Вицепремиерот Дамир Поланчец рече дека овој пропис ќе остане на сила најмалку до 11-ти октомври, официјалниот крај на туристичката сезона. Тогаш владата ќе го преиспита потегот.

Синдикатите и Католичката црква остро се спротивставија на истиот. Крешимир Север, претседател на Независниот хрватски синдикат, рече дека бизнис лобито извојува победа на сметка на работниците, кои може да бидат принудувани да работат во смени што ќе траат повеќе од осум часа -- што претставува кршење на законите за работните односи.

„Јасно е дека новата регулатива за работење до полноќ е донесена од некој кој вози до и назад од работа. Како еден продавач ќе затвора на полноќ, ќе чисти и потоа ќе оди дома?“, рече Север на прес-конференцијата. „Повеќето од нив [не можат да си дозволат да имаат] автомобил. Тие наместо тоа го користат јавниот транспорт, кој по полноќ не е на располагање.“

Локалните власти во крајбрежниот регион, пак, кој е зависен од туризмот, изразија силна поддршка за промената. Во исто време, хрватската државна телевизија емитуваше приказна во која повеќето странски туристи повикуваат на подолго работно време во шпицот на туристичката сезона, пракса во европските земји со големи туристички сектори.

Здруженијата на претприемачи останаа официјално неутрални, одбивајќи да коментираат во страв дека ќе го влошат незадоволството на работниците.