Нов контингент војници на БиХ замина за Ирак

02/09/2008

Во средната на август, нов контингент војници од Босна и Херцеговина й се придружи на мировната мисија Слобода за Ирачаните. Високи претставници ги пофалија за помошта во напорите за интеграција на БиХ во НАТО.

Од Јусуф Рамадановиќ за Southeast European Times во Сараево – 02/09/08

Војниците што ќе заминат во Ирак од Босна и Херцеговина се подготвуваат за својот лет. [Getty Images]

Неодамна нов контингент војници од Вооружените сили на Босна и Херцеговина (ОСБиХ) замина за Ирак, на најризичната мировна мисија во која биле војниците од БиХ досега. Во текот на следните шест месеци припадниците на пешадиските сили на ОСБиХ ќе обезбедуваат дел до Комплексот на базата Викторија (ВБЦ) на коалициските сили во близина на Багдад.

Нивното испраќање се одржа во касарната Рајловац во близина на Сараево на 14-ти август. Заменик-министерот за одбрана, Игор Црнадак изјави дека „Војниците кои ќе ја обезбедуваат коалициската база ќе се соочат со повеќе предизвици и ризик поразличен од уништување неексплодирани направи, во кои нашите единици учествуваа од 2005 година. Ова не е видео игра, но јас верувам дека војниците се добро подготвени.“

Четириесет и девет пешадинци на ОСБиХ ќе помогнат во обезбедувањето на ВБЦ. Тие доаѓаат од различни ентитети на БиХ, Федерацијата на БиХ и Република Српска. Фактот веројатно укажува на успехот на реформите на ОСБиХ, кои й дадоа на земјата поттик во поглед на идната интеграција во НАТО. Капетан Драган Малиќ, командант на единицата, вели дека сите војници се свесни за ризикот со кој ќе се соочат во Ирак, додавајќи: „Сите ние сме многу добро обучени професионалци“.

На своето патување до Ирак тие ќе бидат придружувани од единица која уништува неексплодирани направи, која ја сочинуваат 36 војници. Оваа едница се враќа од својата осма тура во Ирак, додека нејзиниот сегашен командант, капетан Небојша Јанковиќ, се враќа од својата втора тура. Тој вели дека многу од неговите подредени доброволно се пријавиле за втор дел во Ирак.

На церемонијата присуствуваше и претседателот на претседателството на БиХ, Харис Силајџиќ. Тој рече дека учеството на војниците на БиХ во мировните мисии низ светот ќе помогне во забрзувањето на интеграцијата на земјата во НАТО. „Тие дадоа голем придонес за нашиот забрзан пат кон НАТО“, рече тој. „Ние сме благодарни и горди на нив.“

Американскиот амбасадор во БиХ, Чарлс Инглиш, ја повтори благодарноста на американската влада за БиХ и нејзиниот придонес во операцијата Слобода за Ирачаните и рече дека Соединетите Држави силно ја поддржуваат брзата интеграција во НАТО на БиХ.

Пешадинците на ОСБиХ кои заминаа за Ирак добија специјална обука на воениот полигон на планината Мањаца, во близина на Бања Лука. Пред да започнат со задачите во Ирак, тие ќе имаат една недела дополнителна обука во Кувајт.

Според некои проценки, моментно има 2.000 други државјани на БиХ кои работат во Ирак и Авганистан на проекти за инфраструктурата и отстранувањето мини.